دھمکی دینے والے ملک کو بھرپور جواب دینے کا فیصلہ ،قومی سلامتی کمیٹی اجلاس کا اعلامیہ

اسلام آباد (پاک ترک نیوز) قومی سلامتی کمیٹی کے اجلاس کے جاری کردہ اعلامیہ کے مطابق پاکستان نے خفیہ خط میں دھمکی دینے والے ملک کو بھرپو جوابی رد عمل دینے کا فیصلہ کیا گیا ہے ۔
دفاقی دارالحکومت اسلام آباد میں وزیراعظم عمران خان کی زیر صدارت قومی سلامتی کمیٹی کا 37واں اجلاس ہوا ۔ اجلاس میں دفاع ،اطلاعات و نشریات،توانائی،داخلہ ،خزانہ ،انسانی حقوق ،منصوبہ بندی ،کے وزرائ سمیت چیئرمین جوائنٹ چیفس آف سٹاف کمیٹی، آرمی چیف سمیت سروسز چیف،قومی سلامتی کے مشیر و اعلی حکام نے شرکت کی ۔
اجلاس میں قومی سلامتی کمیٹی مشیر نے کمیٹی کو خط پر بریفنگ دی ۔ کمیٹی نے خط پر تشوش کا اظہار کیا اور اسے پاکستان کے اندرونی معاملات میں مداخلت کو ناقابل برداشت قرار دیا۔ حکومت نے خط کا بھرپور جواب دینے کا فیصلہ کیا ہے۔
اعلامیہ کے مطابق خط میں استعمال کئے جانے والے الفاظ سفارتی آداب کے خلاف ہیں اور اس کا جواب سفارتی آداب کو مدنظر رکھ کر دیا جائے گا۔
اعلامیہ کے مطابق قومی سلامتی کمیٹی کو پاکستانی سفیر سے غیر ملکی ایک اعلیٰ عہدیدار کے ساتھ باضابطہ بات چیت پر آگاہ کیا گیا، کمیٹی نے غیر ملکی اہلکار کی جانب سے استعمال کی جانے والی زبان کو غیر سفارتی قرار دیا۔
کمیٹی نے اس بات پر اتفاق کیا کہ غیرملکی مراسلہ پاکستان کے اندرونی معاملات میں کھلی مداخلت کے مترادف ہے۔
وفاقی وزیر برائے منصوبہ بندی اسد عمر نے پارلیمانی کمیٹی برائے قومی سلامتی اجلاس کے بعد میڈیا سے گفتگو کرتے ہوئے کہا کہ اب تین دن سے جاری خط کے جعلی ہونے کا ڈرامہ بند ہوجانا چاہئے، اب قومی سلامتی کمیٹی کے اعلامیہ کے بعد اب یہ بحث ختم ہوجانی چاہئے۔
اس موقع پر صحافی نے سوال کیا کہ عمران خان اپنے ساتھی نہ بچا سکے تو عالمی سازش کیسے ناکام بنائیں گے؟ جس پر جواب دیتے ہوئے اسد عمر کا کہنا تھا کہ وزیراعظم کسی سے ڈرتے ہوتے تو عالمی طاقتوں کے سامنے کھڑا نہ ہوتے ، دس پندرہ ارب روپے اگر باہر سے پھینک دیئے جائیں تو چند لوگ تو ٹریپ میں آہی جاتے ہیں۔
انہوں نے مزید کہا کہ ہم اپوزیشن کے مطالبے پر قومی اسمبلی ایوان میں خط کا معاملہ لانے کے لئے قرارداد لائے مگر اپوزیشن نے اس تحریک کی مخالفت کردی، اپوزیشن اپنے ہی مطالبے سے پیچھے ہٹ گئی، پھر اپوزیشن نے پارلیمانی کمیٹی برائے قومی سلامتی کا اجلاس بلانے کا کہا تھا، اب قوم دیکھے اپوزیشن اگر اس سازش کا حصہ نہیں تو پھر خط دیکھنے سے بھاگ کیوں رہی ہے۔