ٹی ٹونٹی ورلڈ کپ ،نیدرلینڈز نے نمیبیا کو شکست دیدی

گیلونگ(پاک ترک نیوز) آسٹریلیا میں جاری ٹی20 ورلڈکپ میں نیدر لینڈز نے نمیبیا کو شکست دیدی۔ یہ ٹورنامنٹ میں نیدر لینڈز کی مسلسل دوسری فتح ہے ۔ اس فتح کے ساتھ ہی نیدر لینڈز اپنے گروپ میں پوائنٹس ٹیبل پر پہلے نمبر پر پہنچ گیا ۔
تفصیلات کے مطابق نمیبیا نے ٹاس جیت کر پہلے بیٹنگ کرنے کا فیصلہ کیا، جو درست ثابت نہ ہوا اور پوری مقررہ 20 اوورز میں 6 وکٹوں کے نقصان پر محض 121 رنز بناسکی۔
نمیبیا کی جانب سے جان فرائے لنک سب سے زیادہ 43 رنز بناکر نمایاں رہے، ان کے علاوہ دیگر بلےبازوں میں کپتان گیرہارڈ ایراسمس 16، اسٹیفن بارڈ 19 جبکہ ڈیوڈ ویزا 16 رنز بناکر ناٹ آؤٹ رہے۔
نیدرلینڈز کی جانب سے بس ڈی لیڈز نے 2 جبکہ ٹم پرنگل، کالن ایکرمین اور رولف وین ڈر مروی نے ایک ایک وکٹ حاصل کی۔
122رنز کے ہدف کے جواب میں نیدرلینڈز کی اوپننگ جوڑی نے 59 رنز کا آغاز فراہم کیا، وکرم جیت سنگھ 39 رنز بناکر آؤٹ ہوئے جبکہ میکس او ڈاؤڈ نے 35 رنز اسکور کیے۔ ٹام کوپر اور کولن ایکرمین جلد وکٹیں گنوا بیٹھے تاہم بس ڈی لیڈز 20 رنز اسکور کرکے ٹیم کو فتح سے ہمکنار کروادیا۔
نمیبیا کی جانب سے جے اسمٹ نے 2 جبکہ جان فرائے لنک اور برنارڈ شولٹز نے ایک ایک وکٹ حاصل کی۔
اس سے قبل نمیبیا نے ایشین چیمپئین سری لنکا کو 55 رنز سے اپ سیٹ شکست دی تھی جبکہ نیدرلینڈز نے متحدہ عرب امارات (یو اے ای) کو 3 وکٹوں سے مات دی تھی۔