اقوام متحدہ کا مسئلہ فلسطین میں مصروف عمل ہونا ضروری ہے،اردوان

انقرہ (پاک ترک نیوز ) ترکیہ کے صدر رجب طیب اردوان نے کہا ہےکہ عالمی برادری خاص طور پر اقوام متحدہ کا مسئلہ فلسطین میں مصروف عمل ہونا ضروری ہے۔
انقرہ میں اپنے فلسطینی ہم منصب محمود عباس کے ساتھ ایک نیوز کانفرنس کے دوران کہا کہ ہم مقدس مقامات بالخصوص مسجد اقصی کی تاریخی حیثیت کو تبدیل کرنے کی کوشش کرنے والے کسی بھی اقدام کو برداشت نہیں کر سکتے۔ترکیہ کی حیثیت سے ہم فلسطینی کاز کی مضبوط ترین ممکنہ حمایت جاری رکھیں گے، ہمیں غیر قانونی آباد کاروں کے تشدد پر گہری تشویش ہے۔
اردوان اور عباس نے صدارتی کمپلیکس میں دو طرفہ تعلقات، مسئلہ فلسطین اسرائیل اور دیگر علاقائی اور بین الاقوامی پیش رفت پر بات چیت کے لیے ون آن ون بات چیت کی۔
اردوان کا مزید کہنا تھا کہ اقوام متحدہ کے پیرامیٹرز کی بنیاد پر 1967 کی سرحدوں کے اندر مشرقی یروشلم کے دارالحکومت کے ساتھ ایک آزاد فلسطینی ریاست کا قیام ہمارے پورے خطے کے امن اور استحکام کے لیے ضروری ہے۔
اسرائیلی وزیر اعظم بنجمن نیتن یاہو کے بھی اس ہفتے ترکیہ کا دورہ کرنے کی توقع تھی لیکن ہفتے کے آخر میں غیر طے شدہ سرجری کے بعد یہ دورہ ملتوی کر دیا گیا۔
انقرہ اسرائیل فلسطین تنازعہ کے دو ریاستی حل کی بھرپور حمایت کرتا ہے، جس میں مشرقی یروشلم کے دارالحکومت کے طور پر ایک فلسطینی ریاست کا قیام بھی شامل ہے۔