آرمی چیف سے سعودی معاون وزیر دفاع کی ملاقات، دوطرفہ تعاون بڑھانے پر غور

راولپنڈی(پاک ترک نیوز) آرمی چیف جنرل سید عاصم منیر سے سعودی عرب کے معاون وزیر دفاع طلال بن عبداللہ ال اوطیبی نے ملاقات کی ہے۔
پاک فوج کے شعبہ تعلقات عامہ (آئی ایس پی آر) کے مطابق سعودی عرب کے معاون وزیر دفاع طلال بن عبداللہ نے جی ایچ کیو میں آرمی چیف جنرل سید عاصم منیر سے ملاقات کی، ملاقات میں باہمی دلچسپی کے امور اور دفاعی پیداوار سمیت مختلف شعبوں میں تعاون بڑھانے پر غور کیا گیا۔ملاقات میں ملٹری تربیت کے امور کا بھی جائزہ لیا گیا، آرمی چیف نے سعودی رائل فوج کی صلاحیت بڑھانے کے پاک فوج کے عزم کو دہرایا۔
آئی ایس پی آر کے مطابق سعودی وزیر نے دہشتگردانہ کارروائیوں کیخلاف پاک فوج کی کامیابیوں کو سراہا، سعودی وزیر نے عالمی امن اور استحکام کیلئے پاک فوج کے کردارکو بھی تسلیم کیا۔
پاک فوج کے شعبہ تعلقات عامہ نے مزید بتایا ہے کہ سعودی وزیر نے جی ایچ کیو میں پاکستان سعودی عرب دفاعی مشاورتی اجلاس میں بھی شرکت کی، اجلاس میں عالمی و علاقائی سکیورٹی چیلنجز اور سکیورٹی فورسز پر ان کے اثرات کا جائزہ لیا گیا۔دوران اجلاس دفاع کے شعبہ میں جدید ٹیکنالوجی سے استفادہ کرنے اور تعاون بڑھانے کا جائزہ لیا گیا، اجلاس میں دفاعی تعاون بڑھانے کیلئے کوششیں تیز کرنے کے عزم کا اعادہ کیا گیا۔
آئی ایس پی آر کے مطابق اجلاس میں زمینی، فضائی اور بحریہ کے شعبوں میں چیلنجز سے نمٹنے کیلئے صلاحیتیں بڑھانے کے عزم کا بھی اعادہ کیا گیا جبکہ مطلوبہ مقاصد کے حصول کیلئے سفارشات پر بھی غور کیا گیا۔