دبئی (پاک ترک نیوز)ایکسپو 2020 دبئی میں پاکستانی پویلین میں صرف 18 روز کے دوران ایک لاکھ سیاحوں ، مہمانوں کی آمد کا سنگ میل عبور کرلیا اور یکم اکتوبر 2021 سے شروع ہونے والی اس نمائش کے سب سے زیادہ دیکھے جانے والے پویلینز میں شامل ہوگیا–
اماراتی میڈیا کے مطابق پویلین کا رنگا رنگ انٹیریئر اس قدر پرکشش تھا کہ صرف پہلے دن یہاں 8 ہزار لوگ آئے جبکہ پہلے ایک ہفتے میں یہاں آنے والوں کی تعداد 55 ہزار سے تجاوز کرگئی تھی۔ پہلے 18 روز میں ایک لاکھ وزیٹرز کا سنگ میل عبور کرنے کے بعد اگلے تین بعد یہاں آنے والوں کی مجموعی تعداد ایک لاکھ 20 ہزار سے تجاوز کرگئی–
پاکستانی پویلین کے ڈی جی رضوان طارق کا کہنا تھا کہ اس ایکسپو کے آغاز سے ہی پاکستانی پویلین کیلئے عوامی ردعمل مثالی رہا اور ابتدائی 18 ایام میں ایک لاکھ وزیٹرز کا سنگ میل عبور کرلینا بہت مسرکن کن ہے۔ انہوں نے بتایا کہ پویلین کے’ پاکستان کے پوشیدہ خزانے ‘کے عنوان سے ہونے والی سرگرمیوں میں لوگوں نے بہت دلچسپی لی–
پویلین کی لیڈ پروگرامنگ اور مارکیٹنگ افروز ابرو کا کہنا تھا کہ پویلین میں کئی ثقافتی ، معلومات اور کاروباری سرگرمیاں جاری ہیں جن کے ذریعے پاکستان کے سیاحتی اور اقتصادی شعبوں میں موجود بیش بہا مواقع اجاگر کیے جارہے ہیں۔ انہوں نے بتایا کہ پویلین میں نمائش کے تمام چھ ماہ کے دوران تفریح اور کاروباری معلومات سے متعلق کئی پروگرامز ہونگے–
پاکستان کا یہ پویلین اس نمائش کے اپرچیونٹی ڈسٹرکٹ میں واقع ہے اور یہ 3251 مربع میٹر پر بنایا گیا ہے ۔ پویلین کے ذریعے پاکستان میں سیاحت ، کاروبار اور سرمایہ کاری کے مواقع اجاگر کیئے جارہے ہیں۔