لاہور (پاک ترک نیوز) پاکستان اور انگلینڈ کی ٹیموں کے درمیان 7میچوں کی سیریز کا چھٹا ٹی ٹونٹی میچ کل لاہور کے قذافی سٹیڈیم میں کھیلا جائے گا ۔شاہین سیریز اپنے نام کرنے کیلئے پرعزم ہے جبکہ انگلینڈ سیریز برابر کرنے کیلئے میدان میں اترے گی۔
اب تک کھیلے گئے پانچوں میچوں میں قومی ٹیم کو سیریز میں انگلینڈ کیخلاف 3-2کی برتری حاصل ہے ۔میچ میں کامیابی کی صورت میں شاہین انگلینڈ کیخلاف ٹی ٹونٹی سیریز جیت سکتے ہیں۔
گزشتہ روز لاہور کے قذافی سٹیڈیم میں کھیلے گئے پانچویں ٹی ٹوئنٹی میچ میں پاکستان نے انگلینڈ کو سنسنی خیز مقابلے کے بعد 5 رنز سے شکست دی تھی۔
انگلینڈ کی ٹیم پاکستان کی جانب سے دیا گیا 146 رنز کا ہدف حاصل کرنے میں ناکام رہی اور مقررہ اوورز میں 5 وکٹوں کے نقصان پر 139 رنز تک محدود رہی۔
قومی ٹیم کی جانب سے حارث روف نے2 کھلاڑیوں کو آوٹ کیا جب کہ محمد نواز،وسیم جونیئر،افتخار احمد اور عامر جمال نےایک،ایک وکٹ حاصل کی۔قومی ٹیم کو سات میچوں پر مشتمل سیریز میں تین دو کی برتری حاصل ہو گئی ہے۔
یاد رہے کہ 17برس بعد پاکستان کا دورہ کرنے والی انگلینڈ اور پاکستان کے مابین 7میچوں پر مشتمل سیریز کا ساتواں اور آخری ٹی ٹونٹی میچ اتوار کو لاہور کے قذافی سٹیڈیم میں کھیلا جائے گا ۔