واشنگٹن (پاک ترک نیوز) سابق امریکی صدر ڈونلڈ ٹرمپ کی ٹروتھ نامی سوشل میڈیا ایپ آج لانچ ہو گی ۔ایپ رواں ہفتے ایپل کے سٹور پر دستیاب ہو گی۔
تفصیلات کے مطابق سابق امریکی صدر ڈونلڈ ٹرمپ نے فیس بک اور ٹوئٹر کے مقابلے میں نئی ایپ لانچ کریں گے ۔سابق صدر کا انٹرپرائز سبسکرپشن ویڈیو سروس بھی بنائے گا۔
سی ای او ڈیوین نونس کا کہنا ہے کہ ٹرمپ کا ٹروتھ سوشل آج سے ایپل ایپ سٹور سے ڈاون لوڈ کیا جا سکے گا جبکہ مارچ کے آخر تک یہ مکمل طور پر فعال ہو جائے گا۔
نونس ٹرمپ میڈیا اینڈ ٹیکنالوجی گروپ (ٹی ایم ٹی جی) میں بطور چیف ایگزیکٹو شامل ہونے کے لیے اس سال کے آخر میں کانگریس سے ریٹائر ہو رہے ہیں۔
ٹرمپ میڈیا اینڈ ٹیکنالوجی گروپ کا کہنا ہے کہ ٹروتھ سوشل نیٹ ورک سیلیکون ویلی کی بگ ٹیک کمپنیوں کے خلاف لڑے گا، جنہوں نے امریکہ میں مخالف آوازوں کو خاموش کرنے کے لیے یکطرفہ طاقت کا استعمال کیا ہے۔
یاد رہے کہ امریکی انتخابات سے قبل ٹوئٹر نے اشتعال انگیز ٹوئٹس کرنے پر جنوری میں ٹرمپ کا اکاؤنٹ ڈیلیٹ کردیا تھا۔