پاکستان کی ورلڈ کپ میں افغانستان کی بجائے غیر ایشیائی ٹیم سے وارم اپ میچ کی درخواست

لاہور(پاک ترک نیوز) پاکستان نے ورلڈ کپ میں افغانستان کی بجائے غیر ایشیائی ٹیم سے وارم اپ میچ کی درخواست کردی ۔
پی سی بی نے میگا ایونٹ کے وارم اپ میچز میں افغانستان کے خلاف رکھا گیا مجوزہ وارم اپ میچ تبدیل کرنے کی درخواست کردی۔
پاکستان کرکٹ بورڈ نے آئی سی سی کو اپنے مجوزہ فیڈ بیک میں ورلڈ کپ سے قبل وارم اپ میچز میں سے ایک میچ میں ٹیم تبدیل کرنے کو کہا ہے۔پاکستان کا کہنا ہے کہ کہ وارم اپ کیلئے افغانستان کے بجائے کسی غیر ایشین حریف سے میچ رکھ دیا جائے تاکہ پاکستان کیلئے مفید ثابت ہوسکے۔
پی سی بی نے اس سلسلے میں یہ جواز پیش کیا ہے کہ ورلڈ کپ سے قبل ہونے والے ایشیا کپ میں پاکستان کرکٹ ٹیم افغانستان سے مقابلہ کر چکی ہو گی اس لیے دوبارہ وارم اپ میچ میں بھی کھیلنا زیادہ مفید نہیں ہو گا لہٰذا غیر ایشیائی ٹیم سے میچ کرا دیا جائے۔