پی ایس ایل 8،ملتان سلطانز کو آج کوئٹہ گلیڈی ایٹرز کا چیلنج درپیش

ملتان (پاک ترک نیوز) پاکستان سپر لیگ 8میں ملتان سلطانز کا آج جوڑ کوئٹہ گلیڈی ایٹرز سے پڑے گا ۔پاکستان وقت کے مطابق یہ میچ شام ساڑھے سات بجے کھیلا جائے گا ۔
تفصیلات کے مطابق پاکستان سپر لیگ (پی ایس ایل )8کے تیسرے میچ میں آج ملتان سلطانز اور کوئٹہ گلیڈی ایٹرز ملتان سٹیڈیم میں مد مقابل آئیں گی۔
اس سے قبل گزشتہ روزکھیلے گئے میچ میں پشاور زلمی نے کراچی کنگز کو شکست دی تھی ۔
کراچی کنگز نے ٹاس جیت کر پہلے فیلڈنگ کا فیصلہ کیا ۔پشاور زلمی نے مقررہ بیس اوورز میں 5وکٹوں کے نقصان پر 199رنز بنازئے ۔پشاورزلمی کی جانب سے کیڈمور نے 92جبکہ کپتان بابر اعظم نے 68رنز کی اننگز کھیلی ۔
کراچی کنگز کی جانب سے عمران طاہر ، میر حمزہ ،بین کٹنگ اور اینڈریو ٹائی نے ایک ایک وکٹ حاصل کی۔
کراچی کنگز 200رنز کے ہدف کے تعاقب میں 197رنز پر ہمت ہار گئی ۔کپتان عماد وسیم کی ناقابل شکست 80رنز کی اننگز بھی ٹیم کو شکست سے نہ بچا سکی۔
وہاب ریاض اور جمی نیشم نے دو دو کھلاڑیوں کو آئوٹ کیا ۔