عمر گل کا مورنی مورکل کی جگہ آسٹریلیا کیخلاف سیریز میں بائولنگ کوچ بننے کا امکان

لاہور (پاک ترک نیوز) قومی کرکٹ ٹیم کے سابق فاسٹ بائولر عمرگل کا سابق سائوتھ افریقن پیسر مورنی مورکل کی جگہ آسٹریلیا کیخلاف سیریز میں بائولنگ کوچ بننے کا امکان ہے ۔
ورلڈ کپ میں خراب کارکردگی کا مظاہرہ کرنے والی قومی ٹیم کا اگلا چیلنج آسٹریلیا کے خلاف 3 ٹیسٹ میچز کی سیریز ہے، دورہ آسٹریلیا کے لیے عمرگل کو باؤلنگ کوچ کی ذمہ داریاں سونپے جانے کا امکان ہے۔
جنوبی افریقا سے تعلق رکھنے والے مورکل کا پی سی بی کے ساتھ ورلڈکپ تک ذمہ داریاں سنبھالنے کا معاہدہ تھا جس میں اب توسیع نہیں کی جارہی جبکہ مورکل بھی مزید کام کرنے میں دلچسپی نہیں رکھتے، مورکل نے اس بارے میں باقاعدہ طورپر پی سی بی کو آگاہ بھی کردیا۔
پی سی بی نے مورنی مورکل کے ساتھ معاہدے کا باقاعدہ اعلان 17 جون کو کیا تھا تاہم انہوں نے آئی پی ایل سمیت دوسری مصروفیات کی وجہ سے تاخیر سے قومی ٹیم کو جوائن کیا تھا۔
مورکل کی موجودگی میں پاکستانی باؤلرز کی پرفارمنس کا گراف توقعات کے مطابق اچھا نہیں ہو سکا۔