مراکش سے ترکیہ آنیوالی پرواز کی سپین میں ہنگامی لینڈنگ ،27مسافر فرار

بارسلونا(پاک ترک نیوز) مراکش سے ترکیہ آنے والی پرواز کی سپین میں ہنگامی لینڈنگ ،پرواز کے 27مسافر فرار ،مقامی پولیس نےغیر قانونی طور پر داخل ہونے والے 13مسافروں کو گرفتار کرلیا ۔14 افراد اب تک گرفت سے باہر ہے جن کی تلاش جاری ہے۔
تفصیلات کے مطابق ترکیہ سے تعلق رکھنے والی مشہور پیگاسس ایئرلائن مراکش کے شہر کیسا بلانکا سے استنبول جارہی تھی جس میں کل 228 مسافر موجود تھے۔ اس دوران ایک خاتون نے کہا کہ وہ حمل سے ہیں اور شاید بچے کی ولادت ہونے والی ہے۔ اس کے بعد ہنگامی حالت میں طیارے کو بارسلونا کے ایل پراٹ ایئرپورٹ پر اتارا گیا۔
جیسے ہی خاتون کو باہر لے جایا گیا کل 27 مسافر بھی اس دوران تیزی سے باہر نکلے اور ایئرپورٹ کی حدود سے باہر نکلنے کی کوشش کی۔ پولیس نے ان میں سے 13 افراد کو روک لیا جبکہ 14 افراد پولیس کو جُل دے کر فرار ہوگئے اور اب تک گرفتار نہ ہوسکے۔
دوسری جانب جب خاتون کو میٹرنٹی ہوم لے جایا گیا تو وہاں ڈاکٹروں نے کہا کہ اگرچہ وہ حاملہ ضرور ہیں لیکن زچگی میں ابھی کچھ وقت ہے۔ ڈاکٹروں کے اس بیان پر اب خاتون کو عوامی خلل اور فلائٹ روکنے کے الزام میں مقدمات کا سامنا کرنا ہوگا۔
پولیس نے جن 13 افراد کو پکڑا تھا ان میں سے 8 افراد نے دوبارہ طیارے میں بیٹھنے اور اپنی منزل یعنی استنبول جانے پر رضامندی ظاہر کی جب کہ بقیہ افراد نے اس سے انکار کیا اور بعض نے پناہ کی درخواست کی لیکن ان سب کو دوسری فلائٹ سے دوبارہ ان کے ملک بھیجا جائے گا۔
یہ خبر سامنے ضرور آئی ہے تاہم حکومتِ اسپین نے ان افراد کے ممالک کی کوئی تفصیلات نہیں دی۔