وزیراعظم عمران خان اور ازبک صدر میں میگا پراجیکٹس پر اتفاق

بیجنگ (پاک ترک نیوز)

وزیراعظم عمران خان نے بیجنگ میں سرمائی اولمپکس کی افتتاحی تقریب کے موقع پر ازبکستان کے صدر شوکت مرزیوئیف سے ملاقات کی۔
دونوں رہنماؤں نے عقیدے، تاریخ اور ثقافت کے مشترکہ بندھنوں پر مبنی دوطرفہ تعلقات کے تمام پہلوؤں پر تفصیلی تبادلہ خیال کیا ۔
دونوں رہنمائوں نے پاکستان اور ازبکستان کے درمیان شراکت داری کو وسیع پیمانے پر اپ گریڈ کرنے اور اہم منصوبوں پر عمل درآمد کے لیے عملی اقدامات جاری رکھنے کے عزم کا اعادہ کیا۔
وزیراعظم عمران خان نے تجارتی اور اقتصادی تعاون کو بڑھانے کی اہمیت پر زور دیا۔ خاص طور پر تاریخی دو طرفہ ٹرانزٹ ٹریڈ ایگریمنٹ (UPTTA) کو فعال کرنے اور ترجیحی تجارتی معاہدے کو حتمی شکل دینے کے ذریعے۔
انہوں نے ٹرانس افغان ریلوے منصوبے کے لیے پاکستان کی مکمل حمایت کا اعادہ بھی کیا اور آنے والے مہینوں میں اسے آگے بڑھانے کے لیے اگلے اقدامات پر تبادلہ خیال کیا۔ رابطوں اور عوام سے عوام کے رابطوں کو مزید بہتر بنانے کے لیے وزیر اعظم نے سیاحت کو بڑھانے، براہ راست پروازیں دوبارہ شروع کرنے کے لیے تمام اقدامات اٹھانے، بینکنگ روابط کو مضبوط بنانے اور ویزا کے طریقہ کار کو آسان بنانے کی ضرورت پر زور دیا۔
دونوں رہنماؤں نے تعلیم اور ثقافت میں تعاون پر بھی تبادلہ خیال کیا اور مشترکہ تحقیق اور میڈیا منصوبوں پر پیشرفت کاخیرمقدم کیا اور کہا کہ مغل بادشاہ ظہیرالدین بابر پر مشترکہ فلم اور ازبک زبان میں پاکستانی ڈراموں کی ڈبنگ پرتبادلہ خیال کیا۔
انہوں نے علاقائی امن و استحکام کے امور پر بھی تبادلہ خیال کیا۔ دونوں فریقوں نے صورتحال کو مزید خراب ہونے سے بچانے کے لیے بین الاقوامی برادری کی جانب سے افغانستان کے لیے اقتصادی اور انسانی امداد جاری رکھنے کی ضرورت پر زور دیا۔دونوں رہنماؤں نے اتفاق کیا کہ ایک پرامن، مستحکم اور خوشحال افغانستان علاقائی استحکام کے ساتھ ساتھ بنیادی ڈھانچے اور رابطے کے منصوبوں کی تکمیل کے لیے بھی ضروری ہے۔
وزیراعظم عمران خان نے کہا کہ پاکستانی عوام صدر مرزی یوئیف کے دورہ پاکستان پر ان کے استقبال کے منتظر ہیں۔ دونوں فریقوں نے دورے کے ٹھوس نتائج کو یقینی بنانے کے لیے مل کر کام کرنے پر اتفاق کیا۔