پاکستانی کوہ پیما شہروز کاشف نے ایک اور چوٹی سر کر لی

لاہور (پاک ترک نیوز) نوجوان پاکستانی کوہ پیما شہروز کاشف نےایک اور چوٹی سر کر لی۔

تفصیلات کے مطابق پاکستان کے نوجوان کوہ پیما شہروز کاشف نے ایک اور بلند چوٹی برم ٹو بھی سر کرلی ہے ۔ برم ٹو 8035میٹر بلند ہے ۔یہ 8 ہزار میٹر سے بلند نویں چوٹی ہے جو انہوں نے سر کی ہے۔

شہروز چند دنوں میں جی ون سر کرنے کی مہم کا آغاز کریں گے، جو ان کی دسویں 8 ہزار میٹر سے بلند چوٹی ہو گی۔ماؤنٹ ایورسٹ اور کے ٹو سمیت 8 چوٹیاں سر کر نے والے 20 سالہ شہروز کاشف کا تعلق لاہور سے ہے۔

اگر وہ اس میں کامیاب ہو گئے تو وہ 10چوٹیاں سر کرنے والے کم عمر ترین کوہ پیما کا اعزاز اپنے نام کر سکیں گے، خیال رہے کہ شہروز کاشف پہلے ہی 5بلند ترین چوٹیاں سر کرنے والے پاکستان کے کم عمر ترین کوہ پیما ہیں۔

شہروز کاشف 2گینز ورلڈ ریکارڈ کے سرٹیفکیٹ بھی حاصل کر چکے ہیں جبکہ انہیں 2 بلند ترین چوٹیاں سر کرنے پر سرٹیفکیٹ دیے گئے تھے۔