پاکستان اور ویسٹ انڈیز کے درمیان دوسرا ٹی 20میچ آج ہو گا

لاہور(پاک ترک نیوز) پاکستان اور ویسٹ انڈیز کے درمیان دوسرا ٹی 20میچ آج کھیلاجائے گا ۔ شاہینوں کو تین میچوں کی سیریز میں ایک صفر کی برتری حاصل ہے۔پہلے ٹی 20 میچ میں گرین شرٹس نے مہمان وِنڈیز کو تریسٹھ رنز سے شکست دی تھی۔
دونوں ٹیموں کے درمیان نیشنل سٹیڈیم کراچی میں دوسرا ٹی 20 میچ آج کھیلا جائے گا۔ پہلے میچ میں شاہینوں نے اونچی پرواز کی، مہمان ٹیم کو تریسٹھ رنز کی شکست کا سامنا کرنا پڑا، قومی ٹیم نے پہلے بیٹنگ کرتے ہوئے چھ وکٹ کے نقصان پر دو سو رنز بنائے، اوپنر محمد رضوان نے اٹھہتر رنز کی شاندار اننگز کھیلی۔
مڈل آرڈر بلے باز حیدر علی نے بھی مہمان بولرز پر بھرپور لاٹھی چارج کیا ، 6 چوکوں ، 4 چھکوں کی مدد انتالیس گیندوں پر اڑسٹھ رنز بنا کر میچ کے بہترین کھلاڑی قرار پائے۔ دو سو ایک رنز کے پہاڑ جیسے ہدف کا تعاقب کرتے ہوئے مہمان کیربینزانیس اوور میں ایک سو سینتیس رنز پر ڈھیر ہوگئے، محمد وسیم نے چار شکار کیے ،شاداب خان نے تین مہرے کھسکائے۔
تین ٹی 20 میچز کی سیریز میں قومی ٹیم کو ایک صفر کی برتری حاصل ہے۔