آخری ون ڈے کل ،شاہینوں کی ورلڈ کپ میں براہ راست رسائی اور کلین سوئپ پر نگاہئیں

روٹرڈیم (پاک ترک نیوز)پاکستان اور نیدر لینڈز کے درمیان تینوں میچوں کی سیریز کا آخری ایک روزہ میچ کل کھیلا جائے گا ۔ شاہینوں نے ورلڈ کپ میں براہ راست رسائی اور کلین سوئپ مشن پر نظریں جمالیں۔
تفصیلات کے مطابق سیریز کا تیسرا اور آخری میچ کل کھیلا جائے گا۔تیسرے ون ڈے سے قبل شاہین شاہ آفریدی کی دستیابی کا فیصلہ ہوگا، دورئہ سری لنکا میں فیلڈنگ کرتے ہوئے زخمی ہونے والے پیسر کی بحالی فٹنس کیلیے کام نیدرلینڈز میں بھی جاری رہا،ٹیم مینجمنٹ یواے ای میں ایشیا کپ سے قبل ان کو ردھم میں آنے کا موقع فراہم کرنا چاہتی ہے مگر حتمی فیصلہ ڈاکٹرز کی مشاورت سے ہوگا،اس کے علاوہ بھی پاکستان بعض تبدیلیاں کرتے ہوئے بینچ پاور کو آزمانے کا فیصلہ کرسکتا ہے۔
آئی سی سی سپر لیگ کو ورلڈکپ کوالیفائرز کا درجہ حاصل ہے،اس میں 12فل ممبرز کے ساتھ نیدرلینڈز کی ٹیم بھی شریک ہے، آئندہ سال ہونے والے میگا ایونٹ میں میزبان بھارت کے سوا ٹاپ 7ٹیموں کو براہ راست شرکت کا موقع ملے گا، دیگر 5کو کوالیفائنگ ٹورنامنٹ میں شرکت کرنا ہوگی۔
سپر لیگ میں ہر ٹیم کو دیگر 8کیخلاف سیریز کھیلنا ہیں،ان میں سے 4ہوم اور اتنی ہی اوے ہیں،فتح پر 10، ٹائی، بے نتیجہ یا منسوخ میچ کی صورت میں 5پوائنٹس ملتے ہیں، ٹیبل کی موجودہ صورتحال کے مطابق نمبر13 نیدرلینڈز سے جاری ون ڈے سیریز کے تیسرے میچ میں فتح سے پاکستان کلین سوئپ کرتے ہوئے ورلڈکپ میں براہ راست رسائی کا امکان بھی روشن کرسکتا ہے۔
اس وقت انگلینڈ125پوائنٹس کے ساتھ سرفہرست، بنگلہ دیش(120)دوسرے نمبر پر ہے،گرین شرٹس نے نیدرلینڈز کیخلاف مسلسل 2 فتوحات سے پوائنٹس کی تعداد 110کرتے ہوئے تیسری پوزیشن پر قبضہ جمالیا، مزید 10کا اضافہ اتوار کے میچ میں ممکن ہوگا،گرین شرٹس کی نیوزی لینڈ سے سیکیورٹی وجوہات پر ملتوی ہونے والی ون ڈے سیریز جنوری 2023میں ری شیڈول کی گئی ہے۔
کورونا کے باعث التوا کا شکار ہونے والے افغانستان سے 3میچز بھی باقی ہیں، ان کے نتائج سے قطع نظر ٹیم ورلڈکپ کیلیے کوالیفائی کرلے گی،افغانستان100پوائنٹس کے ساتھ چوتھے، نیوزی لینڈ(90)پانچویں،ویسٹ انڈیز (90) چھٹے، بھارت (89) ساتویں، آسٹریلیا (70) آٹھویں، آئرلینڈ (68) نویں، سری لنکا (62) دسویں، جنوبی افریقہ (49) 11، زمبابوے (35) 12 اور نیدرلینڈز(25)13ویں نمبر پر ہے۔
دوسری جانب مہمان کرکٹرز نے دوسرے ون ڈے کے بعد جمعے کو آرام کیا،ہفتے کو کھلاڑی ٹریننگ کیلیے میدان کا رخ کریں گے،بیٹنگ، بولنگ اور فیلڈنگ کی بھرپور مشقوں کا سلسلہ جاری رہے گا۔