آسٹریلیا نے واحد ٹی ٹونٹی میچ میں پاکستان کو شکست دیدی

لاہور(پاک ترک نیوز ) لاہور میں کھیلے گئے واحد ٹی ٹونٹی میچ میں آسٹریلیا نے پاکستان کو تین وکٹوں سے شکست دیدی۔ٹی 20 میچ میں آسٹریلوی کپتان ایرون فنچ نے ٹاس جیت کر قومی ٹیم کے قائد بابر اعظم کو پہلے بیٹنگ کی دعوت دی تھی۔
پاکستان نے پہلے بیٹنگ کرتے ہوئے مقررہ 20اوورز میں 8وکٹوں کے نقصان پر 162رنز بنائے ۔ کپتان بابر اعظم نے 66رنز کی اننگز کھیلی ۔ محمد رضوان 23، فخر زمان صفر، آصف علی 3، افتخار احمد 13 اور حسن علی 10، خوشدل شاہ 24 اور شاہین شاہ آفریدی صفر پر پویلین لوٹے، محمد وسیم جونیئر 2 اور عثمان قادر نے 18 سکور بناکر ناٹ آؤٹ رہے۔آسٹریلوی بائولرنیتھن ایلس نے سب سے زیادہ 4 وکٹیں حاصل کیں، کیمرون گرین نے 2، شان ایبٹ اور ایڈم زمپا نے 1،1 وکٹ حاصل کی۔
مہمان ٹیم نے 163رنز کا ہدف 7وکٹوں کے نقصان پر حاصل کرلیا ۔آسٹریلوی کپتان فنچ نے 55رنز بنائے ۔ ٹریوس ہیڈ 26، جوش انگلس 24، مارنس لبوشین 2، مارکس سٹوئنس 23 اور کیمرون گرین 2 رنز بناکر آؤٹ ہوئے۔
شاہینوں کی جانب سے عثمان قادر ، شاہین شاہ آفریدی، محمد وسیم جونیئر نے 2،2 ، حارث رؤف نے ایک وکٹ اپنے نام کی۔