بابراعظم کی دیگر کھلاڑیوں کے ہمراہ وطن واپسی،شاندار استقبال

لاہور(پاک ترک نیوز) پاکستان کرکٹ ٹیم کے کپتان بابر اعظم دیگر کھلاڑیوں کے ہمراہ وطن واپس پہنچ گئے ، کھلاڑیوں کے لاہورایئر پورٹ پہنچنے پر شائقین پاکستان زندہ باد کے نعرے لگاتے رہے اورسیلفیاں بھی بناتے رہے۔
تفصیلات کے مطابق پاکستان کرکٹ ٹیم ٹی ٹونٹی ورلڈ کپ میں فائنل کھیلنے کے بعد وطن واپس پہنچ گئی ۔ چیئرمین پی سی بی رمیز راجہ، قومی کپتان بابر اعظم اور دیگر ٹیم آفیشلز نجی ایئرلائن کے ذریعے دبئی سے لاہور ایئرپورٹ پہنچے۔ٹیم کے پہنچنے پر سکیورٹی کا سخت انتظام کیا گیا تھا، سخت سکیورٹی میں کھلاڑیوں کو گاڑیوں تک پہنچایا گیا جہاں سے وہ میڈیا سے بات کئے بغیر روانہ ہوگئے۔
کرکٹر آصف علی، لیگ سپنر عثمان قادر اور فاسٹ باؤلر نسیم شاہ بھی چیئرمین پی سی بی اور کپتان بابر اعظم کے ہمراہ لاہور پہنچے ہیں، بابر اعظم کی ایئرپورٹ آمد پر شہریوں نے پاکستان زندہ باد کے نعرے لگائے۔
لاہور ایئر پورٹ پر شہریوں نے کھلاڑیوں کے ساتھ تصاویر اور سیلفیاں بھی بنوائیں، ٹیم کو ویلکم کرنے کے لیے اُن کے اہل خانہ بھی ایئرپورٹ پر موجود تھے۔