بحیرہ عرب میں سمندری طوفان سے پاکستان اور بھارت کے ساحلی علاقے متاثر
سکھر میں سمندری طوفان ٹاک ٹائی کے اثرات، آندھی اورطوفان کے باعث خیرپور، کوٹ ڈیجی اور روہڑی میں بجلی کی فراہمی متاثر ہوئی ہے۔
ترجمان سیپکو کے مطابق گمبٹ، ڈوکری، رسول آباد ودیگر شہروں میں بجلی کی فراہمی متاثر ہوئی ہے۔
ترجمان سیپکو کے مطابق سیپکو کے اہلکار متاثرہ علاقوں میں بجلی کی بحالی کے لیے کوشاں ہیں۔
بحیرہ عرب کے جنوب مشرق میں بننے والے سمندری طوفان ’ٹاک ٹائی‘ نے بھارت میں اثر دکھانا شروع کردیا۔
طوفان کا رخ گجرات کی جانب ہوگیا ہے جس کے بعد بھارتی ریاست کیرالہ میں تیز ہوائیں اور طوفانی بارشیں شروع ہوگئیں۔
تیز ہواؤں کے باعث کئی مکانات کی چھتیں گر گئیں، پانچ اضلاع میں ریڈ الرٹ جاری کردیا گیا۔
بھارتی محکمہ موسمیات نے ریاست گجرات اور قریبی علاقوں کیلئےسائیکلون الرٹ جاری کردیا۔
پاکستان:
بحیرہ عرب میں رواں سال کا پہلا سمندری طوفان ’ٹاک ٹائی‘ اپنی پوری شدت کے ساتھ وجود میں آچکا ہے ۔
طوفان سمندر میں طغیانی کا باعث بنے گا جس کی وجہ سے ماہی گیروں کو گہرے سمندر میں جانے سے منع کردیا گیا ہے جبکہ پہلے سے سمندر میں موجود ماہی گیروں نے واپسی شروع کردی ہے۔
ماہی گیروں کی روزی روٹی سمندر سے وابستہ ہے جن میں سے کچھ اب بھی سمندر میں موجود ہیں۔ ماہی گیروں کی ترجمان تنظیم ان ماہی گیروں کو صوتی رابطے کے ذریعے واپسی کی ہدایات دے رہی ہے۔
کراچی کی قدیم بستی ابراہیم حیدری میں طوفان کے خطرناک اثرات سے بچبے کے لیے مساجد سے اعلانات کے ذریعے آگاہی بھی دی جارہی ہے۔
ابراہیم حیدری، ریڑھی گوٹھ،کاکا پیر،کیماڑی کے ماہی گیروں نے شکار پر روانگی روک دی ہے۔
انچارج فشرمین کوآپریٹو سوسائٹی کے مطابق تمام ماہی گیر لانچوں کو پیغام دے دیا گیا ہے، بڑی تعداد میں لانچیں فش ہاربر ، ابراہیم حیدری میں محفوظ مقام پر آچکی ہیں، ٹھٹھہ، بدین اور کیٹی بندر پر بھی ماہی گیر محفوظ مقامات پر آرہے ہیں، ماہی گیروں کو پیغام دینے اور محفوظ مقام تک پہنچانے میں پاک بحریہ کی مدد بھی لے جارہی ہے۔