بڑا اپ سیٹ ،دو بار کا چیمپئن ویسٹ انڈیز ورلڈ کپ کھیلے بغیر میگا ایونٹ سے باہر

ہوبارٹ(پاک ترک نیوز) ٹی ٹونٹی ورلڈ کپ کوالیفائنگ رائونڈ میں بڑا اپ سیٹ ، دو بار چیمپئن رہنے والا ویسٹ انڈیز کوالیفائنگ رائونڈ میں ہی میگا ایونٹ سے باہر ہو گیا ۔
تفصیلات کے مطابق آئرش ٹیم نے کالی آندھی کو شکست دے کر ٹی ٹونٹی ورلڈ کپ کھیلنے سے قبل ہی باہر کردیا ۔
ہوبارٹ میں جاری ٹی 20 ورلڈکپ کے 11 ویں میچ میں ویسٹ انڈیز نے ٹاس جیت کر پہلے بیٹنگ کرنے کا فیصلہ کیا۔ ویسٹ انڈیز نے پہلے بیٹنگ کرتے ہوئے 5 وکٹوں کے نقصان پر 146 رنز بنائے۔
برینڈن کنگ نے بہترین اننگز کھیلی وہ 48 گیندوں پر 62 رنز بنا کر ناٹ آؤٹ رہے۔ برینڈن کنگ نے ایک چھکے اور 6 چوکے لگائے۔ جانسن چارلس نے 24 رنز بنائے جبکہ اوڈن اسمتھ 19 رنز پر ناٹ آؤٹ رہے۔آئرلینڈ کی جانب سے گیرتھ ڈیلینی نے 16 رنز دے کر 3 وکٹیں حاصل کیں جبکہ بیری میک کریتھی اور سیمی سنگھ نے ایک ایک وکٹ لے۔
ٹی 20 ورلڈ کپ کوالیفائنگ رائونڈ کے میچ میں ویسٹ انڈیز نے آئر لینڈ کو جیت کے لیے 147 رنز کا ہدف دے دیا تھا جو آئر لینڈ نے ایک وکٹ کے نقصان پر پورا کر لیا۔آئر لینڈ کے پال اسٹرلینگ نے بہترین کھیل کا مظاہرہ کرتے ہوئے 48 بالز پر 66 رنز بنائے اور ناٹ آؤٹ رہے۔
آئر لینڈ کے کھلاڑی اینڈریو بالبرنی 23 بالز پر 37رنز بنا کر پویلین لوٹ گئے اور یوں 73 کے مجموعی رنز پر آئر لینڈ کا پہلا کھلاڑی آؤٹ ہوا۔ جس کے بعد ویسٹ انڈیز مخالف ٹیم کا کوئی کھلاڑی آؤٹ نہ کر سکی۔