ترکی میں ہزاروں ڈاکٹرز نے استعفیٰ دیدیا

انقرہ(پاک ترک نیوز)ترکی میں انسانی جان بچانے والی ادویات کی قلت کے بعد ایک اور بحران نے سر اٹھا لیا۔ ہزاروں ڈاکٹرز نے استعفیٰ دیدیا۔جن ڈاکٹرز نے استعفیٰ دیا ہے وہ ترکی سے باہر ملازمت کررہے ہیں، ایک رپورٹ میں یہ بھی انکشاف ہوا ہے کہ 3 ہزار سے زائد ڈاکٹرز بیرون ملک ملازمت حاصل کرنے کے بعد ترکی چھوڑ کر جاچکے ہیں۔
ترک میڈیکل ایسوسی ایشن کی جانب سے جاری کی گئی رپورٹ کے مطابق گذشتہ ڈیڑھ سال میں سرکاری صحت کے اداروں سے منسلک تقریباً 8 ہزار ڈاکٹرز نے عہدوں سے استعفیٰ دیا ہے، جن ڈاکٹرز نے استعفیٰ دیا ہے ان میں 10 فی صد ڈینٹسٹ تھے۔
ترک میڈیکل ایسوسی ایشن کے مطابق محکمہ صحت کے تحت ہسپتالوں میں ہزاروں ڈاکٹرز نے استعفیٰ دے دیا ہے جس کے باعث ملک میں ادویات کی قلت کے بعد اب ڈاکٹرز کے بحران کا بھی سامنا ہے۔
دوسری جانب ترک ڈینٹل سنڈیکیٹ کے سربراہ کا کہنا ہے کہ گزشتہ سال ایک ہزار سے زائد ڈینٹس نے پبلک سیکٹر سے استعفیٰ دیا جس کی وجہ سے متعدد سرکاری کلینکس اور اسپتالوں کو بند کرنا پڑا۔