شائقین کرکٹ کیلئے خوشخبری ،آسٹریلیا کے دورہ پاکستان کا شیڈول جاری
لاہور(پاک ترک نیوز) شائقین کرکٹ کیلئے خوشخبری ،آسٹریلیا کے دورہ پاکستان کا شیڈول جاری کردیا گیاہے۔ آسٹریلیا 24سال بعد پاکستان کا دورہ کرے گی ۔
1998 کے بعد یہ آسٹریلیا کا پاکستان کا پہلا دورہ ہوگا۔ کینگروز ٹیم آئندہ سال مارچ اپریل میں پاکستان کا دورہ کرے گی۔ اس دورے کےدوران3 ٹیسٹ، 3 ون ڈے اور ایک ٹی ٹوئنٹی انٹرنیشنل میچ کھیلا جائے گا۔
اس سیریز کا پہلا ٹیسٹ میچ 3 مارچ سے کراچی میں ہوگا۔ دوسرا ٹیسٹ 12 سے 16 مارچ راولپنڈی اور تیسرا 21 تا 25 مارچ تک لاہور میں کھیلا جائے گا۔ سیریز کے چاروں ایک روزہ میچز لاہور میں کھیلے جائیں گے۔ یہ میچز 29 مارچ سے 5 اپریل تک جاری رہیں گے۔
چیئرمین پاکستان کرکٹ بورڈ رمیز راجہ نے آسٹریلوی ٹیم کے دورہ پاکستان کی تصدیق کرتے ہوئے کہا ہے کہ ہم آسٹریلیا ٹیم کو خوش آمدید کہنے کے لیے تیار ہیں، 3 ٹیسٹ میچز کی سیریز کے انعقاد پر ذاتی طور پر بہت خوشی ہے۔
چیف ایگزیکٹو کرکٹ آسٹریلیا نک ہوکلے کا کہنا ہے کہ پاکستان کی عوام کرکٹ سے پیار کرتی ہے، ہمارا آئندہ سال دورہ پاکستان کرکٹ فینز کو مزید پرجوش کرے گا۔