شاہین آفریدی سے کوہلی سمیت بھارتی کھلاڑیوں کی ملاقات،خیریت دریافت کی

دبئی(پاک ترک نیوز)انجری کا شکار قومی فاسٹ بائولر شاہین شاہ آفریدی سے ویرات کوہلی سمیت بھارتی کھلاڑیوں نے ملاقات کی ۔ بھارتی کھلاڑیوں نے قومی پیسر کی خیریت دریافت کی۔ویرات کوہلی، شریاس ایئر، یوزویندرا چاہال، رشبھ پنٹ اور کے ایل راہول نے شاہین آفریدی سے ملاقات کر کے ان سے فٹنس کا پوچھا اور جلد واپسی کیلئے نیک خواہشات کا اظہار کیا۔
تفصیلات کے مطابق گزشتہ روز ٹریننگ سیشن کے دوران شاہین آفریدی جب آرام کر رہے تھے تو انڈین ٹیم کے کھلاڑی ان سے ملنے آگئے، بھارتی کرکٹ ٹیم کے کھلاڑیوں نے انجری کا شکار فاسٹ باؤلر شاہین آفریدی سے ملاقات کی اور ان کی خیریت دریافت کی۔
ایشیا کرکٹ کپ کیلئے متحدہ عرب امارات میں موجود ٹیموں کے کھلاڑیوں کی آپس میں ملاقاتیں ہورہی ہیں۔ایونٹ کیلئے پاکستان ٹیم کو شاہین آفریدی کی خدمات حاصل نہیں تاہم وہ ری ہیب کیلئے ٹیم کے ساتھ ہیں۔
اس موقع پر دونوں ٹیموں کے کوچنگ اسٹاف کے درمیان بھی خوشگوار ملاقات رہی، گزشتہ روز بابر اعظم اور کوہلی کی ملاقات کو بھی دنیا بھر کے کرکٹ فینز نے سراہا تھا۔
یاد رہے کہ ایشیا کا کل سے آغاز ہو گا ۔ پاکستان روایتی حریف بھارت کیخلاف اتوار 28اگست کو میدان میں اترے گا۔