شاہین آفریدی فٹ ،ورلڈ کپ کیلئے دستیاب ہوں گے

لاہور(پاک ترک نیوز) پاکستان کرکٹ ٹیم کے فاسٹ بائولر شاہین آفریدی فٹ ہو گئے ۔قومی پیسر ورلڈ کپ کیلئے ٹیم کو دستیاب ہوں گے ۔
تفصیلات کے مطابق قومی فاسٹ بائولر شاہین شاہ آفریدی اپنا ری ہیب مکمل کرکے ہفتے کے روز برسبین پہنچیں گے۔حکام کا کہنا ہے کہ قومی اوپنر فخر زمان بھی شاہین شاہ آفریدی کے ہمراہ لندن سے برسبین پہنچیں گے، جہاں وہ ٹیم ڈاکٹر نجیب اللہ سومرو کی زیرنگرانی اپنا ری ہیب مکمل کریں گے۔
پاکستان کرکٹ بورڈ (پی سی بی) کے جاری کردہ اعلامیے کے مطابق شاہین شاہ آفریدی 17 اور 19 اکتوبر کو بالترتیب انگلینڈ اور افغانستان کے خلاف شیڈول وارم اپ میچز میں شرکت کے لیے دستیاب ہوں گے۔
اس حوالے سے قومی فاسٹ بائولر شاہین شاہ آفریدی کا کہنا ہے کہ قومی اسکواڈ کو دوبارہ جوائن کرنے کے لیے بہت پرجوش ہوں، گزشتہ 10 روز سے روزانہ بغیر کسی درد کے تیز رفتاری سے 6 سے 8 اوورز پھینک رہا ہوں، ری ہیب کا یہ پروگرام بہت سخت اور مشکل تھا۔
واضح رہے کہ پاکستان کرکٹ ٹیم کے اسسٹنٹ باؤلنگ کوچ عمر رشید بھی دونوں کھلاڑیوں کے ہمراہ ہوں گے۔