قیام پاکستان کے 75برس مکمل ہونے پر خصوصی لوگو جاری

اسلام آباد(پاک ترک نیوز) قیام پاکستان کے 75برس مکمل ہونے پر خصوصی لوگو جاری کردیا گیا ۔
تفصیلات کے مطابق پاکستان کے قیام کو 75 برس مکمل ہونے ،ڈائمنڈ جوبلی کی خوشی پر ’’عزم عالی شان، شاد رہے پاکستان‘‘ کے عنوان سے خصوصی ‘لوگو’ جاری کردیا گیا۔
وفاقی وزیر اطلاعات مریم اورنگزیب نے ٹویٹ کرتے ہوئے لکھا کہ پاکستان کے 75 برس مکمل ہونے پر لوگو شائع کرنا محض وطن سے محبت اور اس عزم کی تجدید ہے کہ ہمارے بہادر اور عظیم بزرگوں اور شہداء نے جس عزم سے پاکستان بنایا تھا۔
مریم اورنگزیب نے کہا کہ معاشی خود انحصاری کے وژن سے پاکستان کے نوجوان حقیقی معنوں میں قوم کے معمار بنیں گے، قومی ترقی کے ثمرات پائیں گے۔
وفاقی وزیر اطلاعات نے کہا کہ اسی عزم کے ساتھ معاشی طور پر اسے مضبوط اور خودانحصار، فلاحی مملکت اور دفاعی لحاظ سے ناقابل تسخیر بنائیں گے تاکہ قیام پاکستان کے حقیقی مقاصد حاصل ہوں اور عوام کی زندگیوں میں وہ آسانیاں آئیں جن کا خواب برصغیر کے مسلمانوں نے دیکھا تھا۔
ان کا مزید کہنا تھا کہ تعلیم، روزگار، کاروبار اور زندگی کے تمام شعبوں میں ہراول دستہ بنیں گے، ہم اپنے نوجوانوں کو فیصلہ ساز بنائیں گے جبکہ قیام پاکستان کی طرح ایک اسلامی فلاحی، ترقی یافتہ اور معاشی طور پر خودمختار پاکستان کا خواب بھی سچ ہو کر رہے گا۔ ان شاءاللہ۔