پاک ونڈیز آخری ون ڈے کل ،شاہین وائٹ واش کیلئے پرعزم

ملتان(پاک ترک نیوز) پاکستان اور ویسٹ انڈیز کی ٹیموں کے درمیان تیسرا اور آخری ون ڈے کل کھیلا جائے گا ۔ شاہین کالی آندھی کیخلاف وائٹ واش کیلئے پرعزم ہیں ۔
تفصیلات کے مطابق ملتان میں جاری تین میچوں کی سیریز کا تیسرا اور آخری ون ڈے میچ کل کھیلا جائے گا ۔ سیریز کے پہلے دو میچ جیت کر سیریز میں کامیابی کے بعد قومی ٹیم نے وائٹ واش کو ہدف بنا لیا ۔
گزشتہ روز کھیلے گئے میچ میں پاکستان نے ویسٹ انڈیز کو دوسرے ون ڈے میچ میں 120 رنز سے ہرا کر 3 میچوں کی سیریز اپنے نام کرلی ہے، مہمان ٹیم 276 رنز کے ہدف کے تعاقب میں صرف 155 پر ہی ڈھیر ہوگئی۔
قومی ٹیم نے ٹاس جیت کر پہلے بیٹنگ کی اور مقررہ 50 اوورز میں مہمان ٹیم کو 276 رنز کا ہدف دیا تاہم ویسٹ انڈیز کی بیٹنگ لائن ریت کی دیوار ثابت ہوئی اور 32.2 اوورز میں 155 رنز بنا کر تمام کھلاڑی پویلین لوٹ گئے۔ بروکس 42 رنز بنا کر ٹاپ اسکورر رہے۔ جبکہ 4 وکٹیں حاصل کرنے پر محمد نواز کو پلیئر آف دی میچ قرار دیا گیا۔
کپتان بابراعظم 93 بالوں پر 77 رنز جبکہ امام الحق نے 72 بولوں پر 72 رنز کی بہترین اننگز کھیلی اور آوٹ ہوئے، شاداب خان 22، فخر زمان 17 اور محمد رضوان 15 رنز بنا کر پویلین لوٹ گئے۔ محمد حارث اور محمد نواز کا بلہ نہیں چلا اور بالترتیب 3-6 رنز بنا کر چلتے بنے۔ خوش دل شاہ کو فیلپ نے 22 رنز پر شکار کیا۔ مقررہ 50 اوورز مکمل ہونے کے قریب محمد وسیم 17 اور شاہین شاہ آفریدی 15 رنز بنا کر ناٹ آؤٹ رہے۔
ویسٹ انڈیز کے بولر اکیل حسین نے 3 جبکہ الرازی جوسپ اور اینڈرس فیلپ نے 2-2 وکٹوں حاصل کیں۔