پی ایس ایل 7،کوالیفائر میچ میں قلندرز اور سلطانز ٹکرائیں گے

لاہور(پاک ترک نیوز ) لاہور کے قذافی سٹیڈیم میں جاری پلے آف مرحلے کا آج سے آغاز ہو گا ۔ پہلے کوالیفائر میں لاہور قلندرز اورملتان سلطانز کی ٹیمیں مد مقابل آئیں گی۔
تفصیلات کے مطابق پی ایس ایل 7فیصلہ کن مرحلے میں داخل ہو گیا ۔ میزبان قلندرز کو ملتان سلطانز کا چیلنج درپیش ہے ۔ جیتنے والی ٹیم ڈائریکٹ فائنل کا ٹکٹ کٹوائے گی جبکہ ہارنے والی ٹیم کو فیصلہ کن میچ کیلئے دوبارہ ایلیمنیٹر کے میچ سے جیتنے والی ٹیم کا چیلنج درپیش ہو گا۔دونوں ٹیمیں پی ایس ایل 7میں دو مرتبہ آمنے سامنے آ چکی ہیں، کراچی میں ہونے والا مقابلہ سلطانز کے نام رہا تو لاہور میں قلندرز نے میدان مار لیا۔
لاہور قلندرز کے فخر زمان 521 رنز بنا کر سر فہرست ہیں، 479 رنز کے ساتھ محمد رضوان کی دوسری پوزیشن ہے۔ ریکارڈ نو مقابلے جیت کر پلے آف تک پہنچنے والی ٹیم ملتان سلطان جیت کیلئے پر عزم ہے۔
دوسری جانب ٹیم لاہور قلندرز نے بھی فتح کے ساتھ فائنل کیلئے کوالیفائی کرنے پر نظریں جما لیں۔ دونوں ٹیمیں اب تک ایک ایک مرتبہ پی ایس ایل کا فائنل کھیل چکی ہیں۔