یورپی یونین روسی شہریوں کو ویزے دینا بند کردے ،یوکرینی صدر

کیف(پاک ترک نیوز) یوکرین کے صدر ولادی میر زیلنسکی کا کہنا ہے کہ یورپی یونین روسی شہریوں کو ویزے دینا بند کردے ۔
یوکرینی صدر نے یورپی یونین سے مطالبہ کیا ہے کہ فوری طور پر روسی شہریوں پر سفری پابندی عائد کرے۔
یوکرینی صدر وولودیمیر زیلنسکی کا مزید کہنا تھا کہ ہمیں یورپی ممالک کے اتحاد کے تصور اور مشترکہ یورپی اقدار کو تباہ نہیں کرنا چاہیے اور نہ ہی کسی بھی وجہ سے یورپ کو ایک سپر مارکیٹ میں تبدیل ہونا چاہیے۔
صدر وولودیمیر زیلنسکی نے اپیل کی ہے کہ روس کے یوکرین پر جارحیت کے جواب میں یورپی یونین روسی شہریوں کو ویزے دینا بند کردے تاہم روس کی پالیسیوں کے خلاف مزاحمت کرنے والوں کو استثنیٰ حاصل ہو۔
یوکرینی صدر کا مطالبہ ایک طرف، خود یورپی یونین میں بھی تمام روسی شہریوں پر ویزا لے کر داخلےکی پابندی عائد کرنے کی تجویز زور پکڑتی جارہی ہے جن میں جارجیا اور جرمنی پیش پیش ہیں۔
واضح رہے کہ روس نے رواں برس فروری کے آخر میں یوکرین پر حملہ کردیا تھا اور دو شہروں پر قبضے کا دعویٰ بھی کیا ہے جس پر روسی صدر کو عالمی قوتوں کی جانب سے تنقید اور دباؤ کا سامنا بھی ہے۔