سعودی عرب میں مزید 750موٹر سائیکلیں ضبط

ریاض (پا ک ترک نیوز)
سعودی محکمہ ٹریفک نے کہا ہے کہ مختلف شہروں میں گزشتہ ہفتہ تفتیشی کارروائیوں کے نتیجے میں 750 موٹر سائیکلیں ضبط ہوئی ہیں۔
سعودی سرکاری میڈیا کے مطابق موٹر سائیکلیں ٹریفک قوانین کی خلاف ورزی کے باعث ضبط ہوئی ہیں۔محکمہ ٹریفک نے کہا ہے کہ یہ بات واضح ہونی چاہئے کہ جو ٹریفک قوانین گاڑیوں پر لاگو ہوتے ہیں وہی موٹر سائیکلوں پر بھی لاگو ہوتے ہیں۔موٹر سائیکل چلانے کے خواہشندوں کو چاہئے کہ وہ گاڑی کے کاغذات، نمبر پلیٹ، ہیلمٹ، لائسنس اور ٹریفک قوانین کی پابندی کریں۔
محکمہ ٹریفک نے واضح کیا ہے کہ’ٹریفک اہلکاروں کو ہدایت ہے کہ جہاں کہیں بھی موٹر سائیکل کوخلاف ورزی کرتے دیکھیں تو فوری طور پر ضبط کرلیں۔
یاد رہے کہ سعودی قوانین کے مطابق ضبط شدہ موٹر سائیکل سرکار کی ملکیت میں چلی جاتی ہے جسے دوبارہ حاصل نہیں کیا جاسکتا۔