اللہ کے سامنے جھکنے والوں کو غلام بنانے کی کوششیں کی جا رہی ہیں، عمران خان
اسلام آباد (پاک ترک نیوز) سابق وزیراعظم عمران خان کا کہنا ہے کہ اللہ کے سامنے جھکنے والوں کو غلام بنانے کی کوششیں کی جا رہی ہیں۔
چیئرمین پی ٹی آئی عمران خان سے مولانا خان محمد شیرانی نے ملاقات کی جس میں ملکی سیاسی صورتحال اور باہمی دلچسپی کے امور پر تبادلہ خیال کیا گیا۔
اس ملاقات کے موقع پر سابق وزیر اعظم عمران خان نے کہا کہ کٹھ پتلیوں کو قوم کے مستقبل پر غلامی کی تاریکیاں طاری کرنے کی اجازت نہیں دیں گے۔ اہلِ دانش آگے بڑھیں اور قومی حمیت و اثاثۂ مِلّی کے تحفظ کا فریضہ انجام دیں۔
انہوں نے کہا کہ اللہ کے سامنے جھکنے والوں کو غلام بنانے کی کوششیں کی جا رہی ہیں جبکہ اقتدار کے بجائے اقدار اور قومی آزادی و خودمختاری کا تحفظ اہم ہے۔
جمعیت علمائے اسلام شیرانی گروپ کے سربراہ مولانا خان محمد شیرانی نے اسلامو فوبیا کے خلاف عمران خان کی کوششوں کو خراج تحسین پیش کیا اور پاکستان کی آزادی و خودمختاری کے تحفظ کے لیے بھی عمران خان کی کوششوں کی تعریف کی۔
مولانا خان محمد شیرانی نے کہا کہ عمران خان کا تصور ریاستِ مدینہ اور اس کے قیام کے لیے کوششوں کو قدر کی نگاہ سے دیکھتے ہیں اور عمران خان امت مسلمہ کو درپیش مسائل کا قابل عمل حل تجویز کرنے والے پہلے مسلم رہنما ہیں۔