امریکہ کا یوکرین کیلئے مزید 15کروڑ ڈالر فوجی امداد کا اعلان

واشنگٹن (پاک ترک نیوز) امریکہ نے یوکرین کیلئے مزید 15کروڑ ڈالر فوجی امداد کا اعلان کردیا ۔ یہ رقم دفاع اور سلامتی کیلئے خرچ کی جائے گی۔
تفصیلات کے مطابق امریکہ کے صدر جو بائیڈن نے فوجی امداد کے پیکج کا اعلان کرتے ہوئے کہا کہ اس کے ذریعے یوکرین کو جنگی اسلحہ اور ریڈارز کے علاوہ دیگر ساز و سامان فراہم کیا جائے گا۔
جوبائیڈن نے کانگریس پر زور دیتے ہوئے کہا کہ یوکرین کے لیے مزید 33 ارب ڈالر کے امدادی پیکج کی منظوری دی جائے۔
امریکی وزیر خارجہ انٹونی بلنکن نے کہا کہ 24 فروری کو یوکرین پر حملے کے بعد سے امریکہ اب تک 3 ارب 80 کروڑ ڈالر کی مالیت کے ہتھیار کیف کو دے چکا ہے جس میں اینٹی ایئر کرافٹ اسٹنگر میزائل، ڈرونز اور بھاری اسلحہ شامل ہے۔
صدر جو بائیڈن نے ایک بیان میں کہا کہ امریکہ نے یوکرین کو انتہائی تیز رفتاری کے ساتھ تاریخی امداد فراہم کی ہے۔ امریکہ نے یوکرین کی آزادی کے لیے اگلی صفوں میں لڑنے والوں کو براہ راست اسلحہ اور حربی ساز و سامان فراہم کیا جس کی کانگریس نے منظوری دی ہے۔
انہوں نے کہا کہ یوکرین کے لیے منظور شدہ فنڈز ختم ہونے کے قریب ہیں اور یوکرین کی جیت کے لیے انتہائی ضروری ہے کہ امریکہ اور اس کے اتحادی بغیر کسی تعطل کے اسلحہ کی ترسیل جاری رکھیں۔