سہ ملکی ٹی ٹونٹی سیریز ، پاکستان کل بنگلہ دیش سے ٹکرائے گا

کرائسسٹ چرچ (پاک ترک نیوز) تین ملکی ٹی ٹونٹی سیریز میں پاکستان کل بنگلہ دیش سے ٹکرائے گا ۔ میچ پاکستانی وقت کے مطابق صبح 7 بجے شروع ہو گا۔
تفصیلات کےمطابق تین ملکی ٹی ٹونٹی سیریز کا پہلا میچ پاکستان اور بنگلہ دیش کے درمیان کل کھیلا جائے گا ۔ نیوزی لینڈ میں موجود شاہینوں نے پہلے میچ کیلئے بھرپور تیاری کرلی ۔ بارش کے باعث قومی سکواڈ نے انڈور ٹریننگ کی ۔بنگلہ دیش کیخلاف قومی ٹیم کو عددی برتری حاصل ہے، پاکستان نے 15 میں سے 13 میچز میں کامیابی سمیٹ رکھی ہے ۔
دوسری جانب مجموعی طور پر پاکستان کا نیوزی لینڈ کیخلاف ریکارڈ شاندار ہے، قومی ٹیم نے 25 میں سے 15 میچز اپنے نام کر رکھے ہیں جبکہ 10 میں ناکامی کا سامنا کرنا پڑا۔
قومی ٹیم نے نیوزی لینڈ کیخلاف آخری دو میچ بھی جیت رکھے ہیں جبکہ دونوں ٹیموں کے درمیان کرائسٹ چرچ کے میدان کھیلا گیا واحد ٹی 20 میچ بھی گرین شرٹس کے نام رہا۔