ٹی20 ورلڈکپ؛ سری لنکا نے یو اے ای کو شکست دیدی
گیلونگ (پاک ترک نیوز) ٹی ٹونٹی ورلڈ کپ میں سری لنکا نے یو اے ای کو 79رنز س شکست دیدی۔لنکن ٹائیگرز نے ایونٹ میں پہلی فتح اپنے نام کرلی جبکہ یو اے ای کو مسلسل دوسری شکست کا سامنا کرنا پڑا۔
تفصیلات کے مطابق گیلونگ میں کھیلے گئے ٹی ٹونٹی ورلڈ کوالیفائنگ رئاونڈ کے چھٹے میچ میں یو اے ای نے ٹاس جیت کر فیلڈنگ کا فیصلہ کیا، سری لنکا نے پہلے کھیلتے ہوئے مقررہ 20 اوورز میں 8 وکٹوں کے نقصان پر 152 رنز اسکور کیے۔
اوپنر پاتھون نسانکا نے 6 چوکوں اور 2 چھکوں کی مدد سے 74 رنز اسکور کیے جبکہ دھننجایا ڈی سلوا نے 33 رنز اسکور کیے۔ کوشل مینڈس 18، بھانوکا راجا پاکسے 5 رنز بناسکے۔
یو اے ای کی جانب سے کارتک میپن سری لنکا کے خلاف ٹی20 ورلڈکپ 2022 کی پہلی ہیٹرک بناتے ہوئے 3، ظہور خان 2 جبکہ آیان افضل نے ایک وکٹ حاصل کی۔
ہدف کے تعاقب میں یو اے ای کا آغاز اچھا نہ رہا، اوپنر محمد وسیم 2 اور چراغ سوری 14 رنز بناکر جلد وکٹیں گنوا بیٹھے۔ دیگر کھلاڑیوں میں آریان لکڑا، کپتان رضوان ایک ایک رن بناسکے جبکہ ورتیا اروند 9، باسل حمید 2 رنز بناسکے تھے، میچ کے اختتامی لمحات میں آیان افضل نے 19 رنز کی مزاحمتی اننگز کھیلی تاہم ٹیم کو جتوانے میں کامیاب نہ ہوسکے۔
سری لنکا کی جانب سے دشمنتھا چمیرا اور ہسرنگا نے 3، 3 کھلاڑیوں کو پویلین کی راہ دیکھائی جبکہ پرمود مدوشن، مہیش تھیکشنا اور داسن شناکا نے ایک ایک وکٹ حاصل کرنے میں کامیاب ہوئے۔