برطانیہ میں شدید برفباری سے نظام زندگی مفلوج

لندن(پاک ترک نیوز) برطانیہ میں شدید برفباری سے نظام زندگی درہم برہم، ایئرپورٹس بند ہونے سے متعدد پروازیں منسوخ کر دی گئیں۔برف باری فطرت کا حسن بھی ہے اور امتحان بھی، شدید برف باری سے پورا برطانیہ برف سے ڈھک گیا، سردی کی لہر نے ہر چیز کو اپنی لپیٹ میں لے لیا۔
برطانیہ کی سول ایوی ایشن کے مطابق شدید برفباری کے سبب متعدد ایئرپورٹ کے رن ویز عارضی طورپر بند کردیئے گئے ہیں، مسافروں سے کہا گیا ہے کہ جیسے ہی پروازیں دوبارہ شروع ہوں گی انہیں مطلع کردیا جائے گا۔شدید سردی سے جھیلیں، نہریں یہاں تک کہ دریا بھی جم گئے، لندن کی ایسی ہی جھیل میں برف سے ڈھکی کشتیاں ویرانی کے منظر پیش کرنے لگیں۔موٹروے پولیس نے درجنوں ٹریفک حادثات کے باعث عوام کو گھروں میں رہنے کی ہدایت کر دی گئی۔
یو کے ہیلتھ سکیورٹی ایجنسی نے جمعہ تک انگلینڈ میں خون جما دینے والی سردی کی پیشگوئی کی ہے، اسیکس کے کچھ حصوں میں 15 سینٹی میٹر تک برفباری ہونے کا امکان ہے۔