رونالڈو اور میسی آج سعودی عرب کے شہر ریا ض میں مد مقابل
ریاض(پاک ترک نیوز) پرتگالی سٹار فٹبالر کرسٹیانو رونالڈو اور ارجنٹینا کو عالمی چیمپئین بنوانے والے لیونل میسی آج سعودی عرب کے شہر ریاض کے کنگ فہد سٹیڈیم میں ایک دوسرے کے مدمقابل آئیں گے۔
کرسٹیانو رونالڈو کی قیادت میں سعودی آل اسٹار الیون میں النصر اور الہلال کلب کے کھلاڑی شامل ہوں گے، یہ نمائشی میچ کنگ فہد اسٹیڈیم ریاض میں کھیلا جائے گا۔فرانسیسی کلب پیرس سینٹ جرمن (پی ایس جی) اور سعودی آل سٹار الیون کے درمیان میچ آج 19 جنوری کو پاکستانی وقت کے مطابق رات 9 بجے شروع ہوگا۔
میچ کی تمام ٹکٹیں فروخت ہوچکی ہیں جبکہ حکام نے اعلان کیا کہ ایک سعودی ریئل اسٹیٹ بزنس مین نے نیلامی میں 10 ملین ریال کی بولی لگانے کے بعد میچ دیکھنے کا ٹکٹ اپنے نام کرلیا ہے۔
قبل ازیں ٹکٹ کی پہلی بولی تاجر عبد العزیز بغلف نے ٹکٹ کی 30 لاکھ ریال کی بولی لگائی تھی، جس کے بعد متعدد تاجروں نے ٹکٹ کی قیمت کو 10 ملین ریال یعنی (ایک کروڑ ریال) تک پہنچادیا۔
یاد رہے کہ فرانسیسی کلب پی ایس جی اپنی ویب سائٹ پر میچ کو لائیو اسٹریم بھی کرے گا جبکہ میچ کی کمنٹری انگلش، عربی اور فرانسیسی زبان میں ہوگی۔