مصرمیں ہونیوالی 34ممالک کی مشترکہ فوجی مشقیں برائٹ سٹار 2023اختتام پذیر

قاہرہ (پاک ترک نیوز)مصر میں 34 ممالک کی مشترکہ فوجی مشقیں ’ برائٹ سٹار 2023‘ اختتام پذیر ہو گئیں۔فوجی مشقوں میں سعودی عرب بھی شامل تھا ۔
مصر کے محمد نجیب ملٹری بیس میں سعودی عرب سمیت 34 ملکوں کی مشترکہ فوجی مشقیں ’برائٹ سٹار 2023‘ اختتام پذیر ہوگئیں۔
مصر کی فوج کے ترجمان غریب عبدالحافظ نے کہا ہے 31 اگست سے مصر میں 34 ملکی بین الاقوامی جنگی مشقوں کا انعقاد ہوا جس میں 8000 فوجیوں نے شرکت کی۔
یہ مشقیں 31 اگست سے 14 ستمبر تک جاری رہیں اور ان کا مقصد مشترکہ خطرات سے نمٹنا اور باہمی تعاون کو فروغ دینا ہے۔
دوسری جانب سعودی آرمی ٹریننگ اتھارٹی کے سربراہ میجرجنرل عادل البلوی نے کہا کہ سعودی فوجی دستوں نے مقررہ تمام اہداف حاصل کرلیے، خصوصا بین الاقوامی سرحدووں کے تحفظ، سائبر سکیورٹی، بحری امن، میزائل ڈیفنس آپریشن میں تعاون اور مشترکہ بین الاقوامی عسکری آپریشنز کے نفاذ سے متعلق تجربات کا تبادلہ کیا گیا ہے۔
ان کا اس سے قبل کہنا تھا کہ مشترکہ مشقوں کا مقصد شریک افواج کے درمیان آپریشنل تصورات میں یکسانیت لانے کے لیے ہم آہنگی، پیشہ ورانہ مہارتوں کو بڑھانا، دہشت گردی اور گوریلا جنگ کے انسداد کی منصوبہ بندی اور سکیموں پر عمل درآمد ہے۔