جنگ بندی کا اختتام، غزہ پر اسرائیلی حملوں میں بچوں سمیت 20 فلسطینی شہید

غزہ(پاک ترک نیوز) غزہ پر اسرائیل نے حماس سے عارضی جنگ بندی کے خاتمے پر دوبارہ وحشیانہ حملے شروع کردئیے جس کے نتیجے میں 2 بچوں سمیت 20 فلسطینی شہید ہوگئے۔
فلسطینی وزارت صحت کے بیان میں کہا گیا ہے کہ اسرائیلی فضائیہ کی رفاح پر بمباری سے 6 جب کہ شمالی علاقوں میں 14 فلسطینی شہید ہوگئے جن میں خواتین اور بچے بھی شامل ہیں۔
اسرائیلی فورسز کی غزہ کےمغربی علاقے میں بمباری جارہی ہے۔ اسرائیلی فوج نے غزہ کے شمالی علاقے جبالیہ میں ایک گھر کو نشانہ بنایا۔
اسرائیل نے حماس پر جنگ بندی معاہدے کی خلاف ورزی کا الزام عائد کرتے ہوئے غزہ پر دوبارہ حملے شروع کرنے کا اعلان کیا۔
قطر اور مصر کی ثالثی میں 24 نومبر کو اسرائیل اور حماس کے درمیان غزہ میں عارضی جنگ بندی کا معاہدہ ہوا تھا۔ ایک ہفتے کی عارضی جنگ بندی کے دوران حماس نے 100 سے زائد قیدیوں جبکہ اسرائیل نے 240 فلسطینیوں کو رہا کیا تھا۔
اکتوبر 7 سے غزہ پر اسرائیلی حملوں میں اب تک 15 ہزار سے زائد فلسطینی شہید ہوچکے ہیں۔ امریکا نے غزہ پر حملوں کے لیے اسرائیل کی مکمل حمایت جاری رکھنے کا اعلان کیا ہے۔