وزیراعظم کی بل گیٹس سے ملاقات، مل کر کام جاری رکھنے کا عزم

ریاض(پاک ترک نیوز) وزیراعظم شہباز شریف نے بل اینڈ میلنڈا گیٹس فاؤنڈیشن کے بانی بل گیٹس سے ملاقات کی ہے۔
وزیراعظم شہبازشریف اور بل گیٹس کے درمیان ملاقات ریاض میں ورلڈ اکنامک فورم کے خصوصی اجلاس کے موقع پر ہوئی، بل گیٹس نے پنجاب میں حفاظتی ٹیکوں اور پولیو کے حفاظتی قطروں کے پروگرام کی تعریف کی اور اس طرز عمل کو ملک بھر میں پھیلانے کی تجویز دی۔
وزیراعظم نے بل گیٹس کے ساتھ مل کر کام جاری رکھنے کے اپنے عزم کا اعادہ کیا اور اپنے دوبارہ انتخاب پر بل گیٹس کے تہینیتی خط پر ان کا شکریہ ادا کیا۔
ملاقات میں پاکستان اور فاؤنڈیشن کے درمیان حفاظتی ٹیکوں، غذائیت اور مالیاتی شمولیت کے شعبوں میں جاری سرگرمیوں پر بھی تبادلہ خیال کیا گیا جبکہ وزیراعظم نے بل گیٹس کو دوبارہ پاکستان کا دورہ کرنے کی دعوت بھی دی۔
وزیراعظم شہباز شریف نے پاکستان میں پولیو کے خاتمے کیلئے دیرینہ تعاون پر بل اینڈ میلنڈا گیٹس فاؤنڈیشن (بی ایم جی ایف) کا شکریہ ادا کیا۔
وزیراعظم شہباز شریف کا کہنا تھا کہ پاکستان ملک سے پولیو کے خاتمے کیلئے انتھک محنت کر رہا ہے، پولیو سے پاک پاکستان کے حتمی مقصد تک پہنچنے کیلئے تمام شراکت داروں کی طرف سے مسلسل کوششوں کی ضرورت ہے۔
انہوں نے مزید کہا کہ بی ایم جی ایف پاکستان کی سماجی و اقتصادی ترقی میں ایک قابل اعتماد شراکت دار ہے، گیٹس فاؤنڈیشن آئی ٹی، تعلیم اور ڈیزاسٹر مینجمنٹ سمیت دیگر شعبوں میں تعاون فراہم کرتی ہے۔
بانی بل اینڈ میلنڈا گیٹس فاؤنڈیشن کا کہنا تھا کہ پولیو کا خاتمہ مستقبل کی نسلوں کو اس مہلک بیماری سے بچانے کیلئے بہت ضروری ہے۔