بطور میچ ونر بابر نے اب تک خود کو ثابت نہیں کیا،شاہد آفریدی

لاہور(پاک ترک نیوز) پاکستان کرکٹ ٹیم کے سابق کپتان شاہد خان آفریدی کا کہنا ہے کہ بطور میچ ونر بابر نے اب تک خود کو ثابت نہیں کیا۔
مقامی ٹی وی چینل کے شو میں گفتگو کرتے ہوئے شاہد آفریدی کا کہنا ہے بابراعظم بہت اچھے پلئیر ہیں تاہم وہ ابھی میچ فنشر کے طور پر نہیں اُبھر سکے ہیں۔
شاہد آفریدی کا کہنا تھا کہ بابراعظم کے ویرات کوہلی اور ڈی ویلیئر کے لیول پر آنے میں ایک رکاوٹ ہے اور وہ فنشنگ ہے، بطور میچ ونر بابر نے اب تک خود کو ثابت نہیں کیا، میری خواہش ہے بابراعظم ایسا کرے۔
سابق کپتان نے کہا کہ بابراعظم ورلڈ نمبر ون کھلاڑی ہیں اور کریز پر رہ کر دوسرے کو کھلا سکتا ہے کیونکہ وہ سیٹ ہونے میں کچھ وقت لیتے ہیں۔
دوران گفتگو امام الحق نے بھی کہا کہ بابراعظم بھی تسلیم کرتے ہیں کہ میچ فنش کروں، مجھے لگتا ہے کہ بابر کو اپنے اسٹرائیک ریٹ پر بھی کام کرنا چاہیے تاکہ وہ ففٹی ہوتے ہی اپنی مرضی سے ایسا کھیلے کہ بولر بھی اس کا سامنا کرنے سے ڈرے۔