بلاول بھٹو نے پاکستان انٹرنیشنل میری ٹائم ایکسپو اینڈ کانفرنس کا افتتاح کردیا

کراچی (پاک ترک نیوز) وزیر خارجہ بلاول بھٹو نے پاکستان انٹرنیشنل میری ٹائم ایکسپو اینڈ کانفرنس کا افتتاح کردیا ۔
پاک بحریہ کی جانب سے وزارت میری ٹائم افئیرز کے تعاون سے پاکستان انٹرنیشنل میری ٹائم ایکسپو اینڈ کانفرنس (PIMEC) کا انعقاد کیا گیا۔
نمائش کی افتتاحی تقریب ایکسپو سینٹر کراچی میں ہوئی ۔ وزیر خارجہ بلاول بھٹو زرداری PIMEC کی افتتاحی تقریب کے مہمان خصوصی تھے۔ چیف آف دی نیول اسٹاف ایڈمرل محمد امجد خان نیازی بھی اس موقع پر موجود ہیں ۔
آج کی اس تقریب میں سول ملٹری، غیر ملکی اور مقامی مندوبین کی بڑی تعداد بھی شریک ہے۔
پاکستان انٹرنیشنل میری ٹائم ایکسپو اینڈ کانفرنس 12-10 فروری تک کراچی ایکسپو سینٹر میں منعقد کی جا رہی ہے ۔اس نمائش کا مقصد قومی اسٹیک ہولڈرز اور بین الاقوامی برادری کے درمیان پاکستان کی بلیو اکانومی کی استعداد کے بارے میں آگہی کا فروغ ہے۔
اپنی نوعیت کی اس پہلی نمائش اور کانفرنس میں غیر ملکی اور مقامی فرمز سمیت تقریباً 130 سے زائد نمائش کنندگان شرکت کر رہے ہیں۔

نمائش کے ساتھ پاکستان نیوی کے زیراہتمام 10 سے 12 فروری 2023 تک نیشنل انسٹی ٹیوٹ آف میری ٹائم افیئرز (NIMA) کی جانب سے انٹرنیشنل میری ٹائم کانفرنس کا انعقاد بھی کیا جا رہا ہے جہاں ممتاز بین الاقوامی اور قومی اسکالرز اپنے مقالہ جات پیش کریں گے ۔ کانفرنس کا عنوان ‘ بلیو اکانومی کا فروغ-ترقی پذیر ممالک کے لیے چیلنجز اور مواقع’ ہے۔