انٹرنیشنل کرکٹ میں شکست کو سرپرائز نہیں کہہ سکتے ،شاداب خان

لاہور(قیوم زاہد سے )قومی ٹیم کے آل رائونڈر شاداب خان کا کہنا ہے کہ انٹرنیشنل کرکٹ میں شکست کو سرپرائز نہیں کہہ سکتے ۔
تفصیلات کے مطابق قذافی اسٹیڈیم میں میڈیا سے بات کرتے ہوئے قومی کرکٹ ٹیم کے آل رائونڈر شاداب خان نے کہا کہ انٹرنیشنل کرکٹ میں شکست کو سرپرائز نہیں کہہ سکتے،نیوزی لینڈ کی ٹیم میں بڑے کھلاڑی شامل نہیں ہیں مگر آنے والے وقت میں یہی اسٹار ہوں گے۔
انہوں نے کہا کہ آج کل کی کرکٹ میں اسٹرائیک ریٹ بہت معنی رکھتا ہے،اس معاملے میں بہتری لانا ضروری ہے، ہمیں اب اندازہ ہوچکا ہے کہ بڑی ٹیموں کے خلاف جیتنے کیلیے اچھے اسٹرائیک ریٹ کے ساتھ کھیلنا ہوگا، میرے خیال سے ہمیں تھوڑا وقت چاہیے ہوگا کیونکہ نئی منیجمنٹ ہے، ہر منیجمنٹ کے اپنے خیالات ہوتے ہیں، کسی معاملے میں اگر غلطی ہو تو ہمیں تسلیم کرنا چاہیے اس سے چیزیں بہتر ہوتی ہیں۔
پہلے کہا جارہا تھا کہ سینئرز کی جگہ نئے پلیئرز کو موقع دیا جائے جبکہ اب کہہ رہے ہیں کہ کتنے نئے تجربے کرنے ہیں۔
شاداب خان نے کہا کہ ایسی کوئی بات نہیں کہ میں نائب کپتان بننے والا ہوں، یہ ٹیم منیجمنٹ کا فیصلہ ہوگا کہ کس کو یہ ذمہ داری دینا ہے، اپنے بیٹنگ نمبر کے حوالے سے نہیں بتا سکتا، مگر ٹیم منیجمنٹ کے ساتھ اس معاملے پر بات ہوتی ہے، میں ذہنی طور پر بہت پرسکون ہوں کیونکہ جو مجھے رول دیا گیا ہے اس سے خوش ہوں، اسی طرح سے تمام کھلاڑیوں کو ٹیم میں مختلف رول دیے گئے ہیں،ہمارے پاس ایسا کمبی نیشن موجود ہے کہ ہم ورلڈکپ جیت سکتے ہیں۔