چیمپئنز ٹرافی 2025 کے شیڈول کا مسودہ منظوری کے لیے آئی سی سی کو ارسال
لاہور(پاک ترک نیوز) پاکستان کرکٹ بورڈ (پی سی بی )نے چیمپئنز ٹرافی 2025 کے شیڈول کا مسودہ منظوری کے لیے آئی سی سی کو بھیج دیا۔
تفصیلات کے مطابق پاکستان کرکٹ بورڈ (پی سی بی) نے آئندہ سال ہونے والی آئی سی سی چیمپئنز ٹرافی کا شیڈول حتمی منظوری کے لیے آئی سی سی کو بھیج دیا ہے۔
ڈرافٹ شیڈول کے مطابق ٹورنامنٹ 19 فروری سے 9 مارچ تک کراچی، لاہور اور راولپنڈی میں ہوگا۔
ٹورنامنٹ میں کل 15 میچ ہوں گے اور بھارت اپنے تمام میچ لاہور میں کھیلے گا۔
فائنل سمیت سات میچز لاہور میں ہوں گے۔ کراچی کا نیشنل اسٹیڈیم افتتاحی میچ اور سیمی فائنل کی میزبانی کرے گا۔ کراچی میں کل تین میچز ہوں گے۔ راولپنڈی سیمی فائنل سمیت پانچ میچوں کی میزبانی کرے گا۔
قذافی سٹیڈیم میں پی سی بی ہیڈ کوارٹر کی جگہ جدید کارپوریٹ بکس بنائے جائیں گے تاہم پوری عمارت کو گرایا نہیں جائے گا۔
ڈریسنگ روم جو حال ہی میں بنائے گئے ہیں وہ جگہ پر رہیں گے۔ فضل محمود اور عمران خان انکلوژر میں تماشائیوں کی گنجائش میں اضافہ کیا جائے گا اور موجودہ ڈھانچے کے پیچھے سے مزید بلند کیا جائے گا۔
لاہور، کراچی اور پنڈی سٹیڈیم میں نئی ڈیجیٹل اسکرینیں لگائی جائیں گی۔ کراچی کے نیشنل اسٹیڈیم کی عمارت کی حالت کو بہتر بنایا جائے گا اور یونیورسٹی اینڈ پر اسکور بورڈ کے ساتھ نیا میڈیا سینٹر بنایا جائے گا۔