ایف بی آر نے ٹیکس فراڈ کرنے والوں کا نیٹ ورک بے نقاب کر دیا
اسلام آباد (پاک ترک نیوز) فیڈرل بورڈ آف ریونیو (ایف بی آر )نے ٹیکس فراڈ کرنے والوں کا نیٹ ورک بے نقاب کر دیا۔
ایف بی آر نے جعلی سیلز ٹیکس انوائسز جاری کرنے میں ملوث ٹیکس فراڈ کرنے والوں کے نیٹ ورک کا پردہ فاش کیا، جس سے قومی خزانے کو 21.69 ارب روپے کا نقصان پہنچا۔
ایف بی آر کے ڈائریکٹوریٹ آف انٹیلی جنس اینڈ انویسٹی گیشن کراچی اور حیدرآباد نے سیلز ٹیکس ایکٹ 1990 کے تحت رحمان انٹرپرائزز کے خلاف 10 ارب روپے کے ٹیکس فراڈ اور زیڈ اے امپیکس کے خلاف 11.69 ارب روپے کی ایف آئی آر درج کیں۔
منظم گروہ جعلی یونٹس/کمپنیاں بنانے اور سیلز ٹیکس کی جعلی رسیدیں جاری کرنے میں ملوث تھے۔ اس کے بعد فنانشل مانیٹرنگ یونٹ (ایف ایم یو) نے تفصیلی مالیاتی انٹیلی جنس (ایف آئی) رپورٹ جاری کرکے اس گھوٹالے کی تصدیق کی۔
فنانشل مانیٹرنگ یونٹ نے کہا کہ جعلی یونٹس قائم کیے گئے اور کم تنخواہ والے ملازمین کے نام پر رجسٹرڈ کیے گئے۔ ایف بی آر کی رپورٹ کے مطابق گلریز احمد رضا منظم گروہوں کی قیادت کرنے والا اہم شخص ہے۔