پہلی بار پاکستان کا نام بھارتی ٹیم کی جرسی پر سجے گا

لاہور(پاک ترک نیوز) تاریخ میں پہلی بار پاکستان کا نام بھارتی ٹیم کی جرسی پر سجے گا۔
ایشیا کپ کیلئے تیار شدہ بھارتی جرسی پر پاکستان کا نام بھی درج ہے، ایونٹ کا آغاز 30 اگست کو پاکستان اور نیپال کے درمیان میچ سے ہوگا، یہ ایونٹ مکمل طور پر پاکستان میں ہونا تھا تاہم بھارت نے اپنی ٹیم بھیجنے سے انکار کردیا، جس کی وجہ سے 4 میچز پاکستانی گراؤنڈز اور باقی تمام مقابلے سری لنکا میں ہوں گے۔
اس سے قبل بھارت نے کبھی اپنی ٹیم کی جرسی پر پاکستان کا نام نہیں لکھا تاہم اس بار ایشیا کپ کا اصل میزبان چونکہ پاکستان ہے اس لیے بی سی سی آئی کو نہ چاہتے ہوئے بھی اپنی ٹیم کی جرسیوں پر ایشیا کپ کے لوگو کے ساتھ پاکستان لکھوانا پڑا، جب بھارتی ٹیم ایشیا کپ کے دوران میدان میں اترے گی تو اس کے کھلاڑیوں کی شرٹس پر پاکستان کا نام جگمگا رہا ہو گا۔
ایشیائی میگا ایونٹ میں پاکستان اور بھارت کے درمیان میچ 2 ستمبر کو کینڈی میں ہوگا جس کے ہاؤس فل رہنے کی توقع ہے، اگر دونوں سپر 4 اور فائنل میں جگہ بنائیں تو ٹورنامنٹ میں مجموعی طور پر روایتی حریف 3 مرتبہ مد مقابل آ سکتے ہیں، شائقین بھی دونوں ٹیموں کے ایک دوسرے کے خلاف مدمقابل آنے کا بے صبری سے انتظار کررہے ہیں۔
یہ ایونٹ بھارتی سینئر جوڑی روہت شرما اور ویراٹ کوہلی کیلیے بھی کافی اہم ہے ، انھیں ورلڈ کپ سے قبل رنز بناکر اعتماد بحال کرنا ہوگا، ایشیا کپ سے قبل بھارتی کرکٹ ٹیم کا ٹریننگ کیمپ بھی لگے گا،ایونٹ کے ٹکٹوں کی فروخت بھی جلد شروع ہونے کا امکان ہے۔