چار روزہ میچ:پہلے روزپاکستان کے 6وکٹوں پر 324رنز

کینبرا(پاک ترک نیوز) آسٹریلیا میں پاکستان اور پرائم منسٹر الیون کے درمیان چار روزہ میچ کے پہلے دن کے اختتام پر شاہینوں نے 6 وکٹوں کے نقصان پر 324 رنز بنا لیے۔کپتان شان مسعود 156رنز بنا کر کریز پر موجود ہیں ۔
تفصیلات کے مطابق کینبرا کے مانوکا اوول گراؤنڈ میں پاکستان نے ٹاس جیت کر پہلے بیٹنگ کا فیصلہ کیا۔
پاکستان کی جانب سے عبداللہ شفیق اور امام الحق نے اننگز کا آغاز کیا لیکن امام الحق 9 رنز بنا کر بکنگھم کی گیند پر وکٹوں کے پیچھے کیچ آؤٹ ہو گئے۔عبداللہ شفیق 38 رنز بنا کر آئوٹ ہوئے جبکہ سابق کپتان بابر اعظم بھی 40 رنز بنا کر بکنگھم کا شکار بنے۔
سعود شکیل اور سرفراز احمد بھی زیادہ دیر کپتان کا ساتھ نہ دے سکے تاہم بائیں ہاتھ کے بلے باز 13 جبکہ وکٹ کیپر بلے باز 41 رنز بنا کر پویلین لوٹ گئے جبکہ آل راؤنڈر فہیم اشرف بھی پچ پر نہ ٹھہر سکے اور محض 17 رنز بنا کر چلتے بنے۔
پہلے دن کے اختتام پر پاکستان نے 6 وکٹوں کے نقصان پر 324 رنز بنا لیے ہیں، قومی کپتان شان مسعود 156 رنز کے ساتھ وکٹ پر موجود ہیں۔