عمران خان کی توشہ خانہ کیس میں نا اہلی کیخلاف اپیل واپس لینے کی درخواست مسترد
اسلام آباد (پاک ترک نیوز) اسلام آباد ہائیکورٹ نے سابق وزیراعظم اور پاکستان تحریک انصاف کے بانی عمران خان کی توشہ خانہ ریفرنس میں الیکشن کمیشن کی جانب سے سنائے گئے نااہلی کے فیصلے کے خلاف اپیل واپس لینے کی درخواست مسترد کردی۔
چیف جسٹس اسلام آباد ہائی کورٹ نے توشہ خانہ کیس میں الیکشن کمیشن کے فیصلے کے خلاف بانی پی ٹی آئی عمران خان کی اپیل واپس لینے کی درخواست پر محفوظ فیصلہ سنادیا۔
عدالت نے توشہ خانہ ریفرنس میں الیکشن کمیشن کے فیصلے کے خلاف اپیل واپس لینے کی درخواست مسترد کردی۔
سابق وزیراعظم عمران خان نے 21 اکتوبر 2022 کے فیصلے کے خلاف اپیل دائر کی تھی۔ انہوں نے لاہور ہائیکورٹ میں بھی ایک اپیل زیر التوا ہونے کی وجہ سے اسلام آباد ہائی کورٹ میں اپیل واپس لینے کی درخواست دائر کی تھی۔
سابق وزیراعظم عمران خان نے 18 جنوری کو اپیل واپس لینے کی درخواست دائر کی تھی ۔ 13 ستمبر کو فریقین کے دلائل کے بعد عدالت نے فیصلہ محفوظ کیا تھا۔
وکیل بیرسٹر علی ظفر نے دلائل میں کہا تھا کہ چیئرمین پی ٹی آئی الیکشن کمیشن کے خلاف اپیل اسلام آباد ہائی کورٹ سے واپس لے کر لاہور ہائیکورٹ چلانا چاہتے ہیں۔
یاد رہے کہ الیکشن کمیشن نے 21 اکتوبر 2022 کو چیئرمین پی ٹی آئی کو نااہل کرکے ڈی سیٹ کیا تھا اور الیکشن کمیشن کے اسی فیصلے میں سیشن کورٹ میں فوجداری کمپلینٹ بھیجی گئی تھی۔ اُسی فوجداری کارروائی کی کمپلینٹ کے فیصلے میں 5 اگست کو چیئرمین پی ٹی آئی کو سزا ہوئی تھی۔