مقبوضہ کشمیر ،بس گہری کھائی میں گرنے سے36 مسافر ہلاک

سری نگر(پاک ترک نیوز) مقبوضہ کشمیر میں مسافر بس موڑ کاٹتے ہوئے 300 فٹ گہری کھائی میں گر گئی جس کے نتیجے میں 36 افراد ہلاک اور 19 زخمی ہوگئے۔
یہ افسوسناک حادثہ مقبوضہ کشمیر کے ضلع ڈوڈہ میں پیش آیا۔ مسافر بس میں 55 سے زائد مسافر سوار تھے۔بس حفاظتی جنگلا توڑتے ہوئے 300 فٹ گہری کھائی میں جا گری۔ بس میں خواتین اور بچے بھی سوار تھے۔ کھائی گہری ہونے اور پُرخطر راستوں کے باعث امدادی کاموں میں مشکلات کا سامنا رہا۔
حادثہ بس ڈرائیور کی غفلت کی وجہ سے پیش آیا۔ تیز رفتار بس ایک خطرناک موڑ کاٹتے ہوئے ڈرائیور سے بے قابو ہوگئی۔
امدادی کاموں کے لیے فوج کو طلب کیا گیا جب کہ ہیلی کاپٹر کی بھی مدد لی گئی۔ حادثے میں 36 افراد ہلاک اور 19 زخمی ہوگئے جن میں سے 6 کی حالت نازک ہے جس کے باعث ہلاکتوں میں اضافہ کا خدشہ ظاہر کیا جا رہا ہے۔
حکومت کی جانب سے ہلاک ہونے والوں کے لواحقین کے لیے فی کس 2 لاکھ جب کہ زخمیوں کے لیے فی کس 50 ہزار مالی امداد کا اعلان کیا گیا ہے۔