پاکستان کرکٹ ٹیم میں میرٹ کو یقینی بنایا جائے: وزیراعظم

لاہور(پاک ترک نیوز) وزیراعظم شہباز شریف نے ہدایت کی ہے کہ پاکستان کرکٹ ٹیم میں میرٹ کو یقینی بنایا جائے۔
وزیراعظم شہباز شریف کا قذافی سٹیڈیم کی اپ گریڈیشن کا سنگ بنیاد رکھنے کی تقریب سے خطاب کرتے ہوئے کہنا تھا کہ چیئرمین پی سی بی محسن نقوی سے کہا ہے کرکٹ ٹیم کی تشکیل نوکریں، میرٹ کی بنیاد پر کھلاڑیوں کا انتخاب کیا جائے۔
وزیراعظم نے کہا کہ کسی بھی سفارش کو مسترد کرتے ہوئے صرف ٹیلنٹ کو آگے لایا جائے، کرکٹ ٹیم کی تشکیل نو ایک بڑی کامیابی ہو گی، میرٹ کیخلاف میں بھی سفارش کروں تو نہ مانیں۔
ان کا کہنا تھا کہ چیئرمین پی سی بی محسن نقوی کرکٹ پر بھرپور توجہ دیں، امید ہے پاکستان کرکٹ کا نام دوبارہ روشن ہو گا۔
شہباز شریف نے کہا کہ کرکٹ سٹیڈیمز کو جدید خطوط پر استوار کرنے کی ضرورت ہے، خوشی ہے قذافی سٹیڈیم کا سٹرکچر جدید خطوط پر استوار کرنے کا اقدام اٹھایا گیا، منصوبے کا ذمہ سنبھالنے پر محسن نقوی کو خراج تحسین پیش کرتا ہوں۔
ان کا کہنا تھا کہ محسن نقوی نے بطور نگران وزیراعلیٰ پنجاب بہترین کام کرائے، امید ہے محسن نقوی اس منصوبے کو بھی جلد پایہ تکمیل تک پہنچائیں گے۔