اسرائیل کے فضائی حملے میں حماس کے نیول کمانڈر شہید

تل ابیب(پاک ترک نیوز) اسرائیل کی جانب سے دعوی کیا گیا ہے کہ انٹیلی جنس بنیاد پر کی گئی ایک کارروائی کے دوران حماس کے بحری سرگرمیوں کے کمانڈرز محمد احمد علی کو نشانہ بنایا۔
اسرائیلی فوج کی جانب سے جاری بیان میں کہا گیا ہے کہ حماس کے نیول کمانڈر گزشتہ شب فضائی حملے میں مارے گئے۔ یہ ایک بہت بڑی کامیابی ہے۔حماس کے نیول کمانڈر محمد احمد علی 7 اکتوبر کو حملے میں ملوث تھے اور عزالدین القسام بریگیڈ کا اہم رکن تھے جو اسرائیلی فوج پر حملوں کی کارروائی کی منصوبہ ساز تھے۔اسرائیل پر حملے کے ایک ایک ذمہ دار کو ڈھونڈ نکالیں گے اور قرار واقعی سزا دیں گے۔
فضائی حملے میں کمانڈر محمد احمد علی کی شہادت کے اسرائیلی دعوے کی حماس کی جانب سے تردید یا تصدیق نہیں کی گئی۔اسرائیل نے امریکا اور مغربی ممالک کی مخالفت کے باوجود غزہ کے بعد اب رفح میں بھی فوجی کارروائی شروع کردی۔
واضح رہے کہ 7 اکتوبر سے جاری غزہ پر اسرائیلی بمباری میں شہید ہونے والے فلسطینیوں کی تعداد 34 ہزار 900 سے زائد ہوگئی جب کہ 78 ہزار 500 سے زائد زخمی ہیں۔