نیپال سے بارش کے باعث میچ منسوخ ،سری لنکا ٹی 20 ورلڈ کپ سے باہر

لاڈرہل (پاک ترک نیوز) آئی سی سی ٹی 20 ورلڈ کپ میں سری لنکا اور نیپال کا میچ بارش کے باعث منسوخ کر دیا گیا یوں آئی لینڈرز پہلے راؤنڈ میں ہی میگا ایونٹ سے باہر ہوگئے۔
ٹی 20 ورلڈ کپ میں 23 واں میچ گروپ ڈی کی ٹیموں سری لنکا اور نیپال کے درمیان آج کھیلا جانا تھا
لاڈرہل میں ہونے والے اس میچ میں لنکن ٹائیگرز کو سپر ایٹ مرحلے تک رسائی کی امیدیں برقرار رکھنے کے لیے یہ میچ جیتنا ضروری تھا تاہم بارش آڑے آگئی اور میچ منسوخ کر کے دونوں ٹیموں کو ایک ایک پوائنٹ دے دیا گیا۔بارش نے ٹاس ہونے کا موقع بھی فراہم نہیں کیا اور یوں سابق عالمی چیمپئن کے ارمان بارش میں بہہ گئے۔
سری لنکا جو اس سے قبل جنوبی افریقہ اور بنگلہ دیش سے میچز ہارنے کے بعد جیت کی متلاشی تھی تاہم اب اسے خالی ہاتھ گھر واپس جانا پڑے گا۔
گروپ ڈی میں جنوبی افریقہ 6 پوائنٹ کے ساتھ پہلے نمبر پر اور سپر ایٹ مرحلے کے لیے کوالیفائی کر چکی ہے جب کہ سری لنکا ایک پوائنٹ کے ساتھ سب سے آخری نمبر پر ہے۔