حج قوانین کی خلاف ورزی پرایک لاکھ 53 ہزار افراد کو واپس بھجوا دیا گیا

مکہ مکرمہ (پاک ترک نیوز) حج قوانین کی خلاف ورزی کرنے پر وزٹ ویزا کے حامل 153,000 سے زیادہ افراد کو واپس بھیجا گیا۔
سعودی عرب کے محکمہ داخلہ میں حج سکیورٹی فورسز کمانڈز نے پریس کانفرنس کرتے ہوئے بتایا ہے کہ جلد حج بیت اللہ شریف خادمین الحرمین الشریفین کی سپورٹ سے سمارٹ حج بن جائے گا، حاجیوں کی حفاظت اور سلامتی کو یقینی بنانا ہماری بنیادی ترجیح ہے۔
سعودی حکام نے بتایا کہ حج پرمٹ سے محروم افراد کو مقدس مقامات میں داخل ہونے سے روکا جارہا ہے، مکہ شہر کے داخلی راستوں پر ایک سکیورٹی کارڈن نافذ ہے تاکہ غیر مجاز کا داخلہ روکا جا سکے، حج اور حاجیوں کی سلامتی ہماری ریڈ لائن ہے، سعودی حج کے کوائف کی خلاف ورزی کرنے والی 97,000 سے زیادہ گاڑیوں کو واپس کیا گیا۔وزٹ ویزے پر حج کرنے کی اجازت نہیں ہے، حج کی اجازت حاصل کرنا ضروری ہے اور اس کا اعلان پہلے کیا گیا تھا، سکیورٹی حکام کو تمام تر مٹیریل، مکینیکل اور انسانی وسائل فراہم کئے گئے ہیں تاکہ حجاج کی سلامتی کے لئے اقدامات کئے جا سکیں۔
سکیورٹی پوائنٹس پر سختی کی وجہ سے خلاف ورزی کرنے والوں کی تعداد میں خاطر خواہ کمی ہوئی ہے۔